Jýyrda Almatyda lai kóshkini júrip, bútin bir otbasynyń ómirin qiyp ketti. Oqiǵa Medeý aýdanynda boldy. Al Almatynyń burynǵy ákimi Viktor Hrapýnov 1995 jyly Medeý aýdanyndaǵy aýdany 0,17 gektar bolatyn jer ýchaskesi belgili bir azamatqa ótip ketkenin aitady, - dep habarlaidy Dalanews.kz Vyhod k pravde Telegram-arnasynyń derekterine siltep.
Telegram-arna qashqyn eks-ákimniń sózderin keltiredi. Onyń sózinshe, bul jerdiń taǵdyry birneshe márte sheshilgen.
"Ol kezde Energetika ministrliginde qyzmet etip júrdim. 11 jyldan keiin, iaǵni 2006 jyly Almaty qalasynyń ákimi Imanǵali Tasmaǵambetov boldy, olar jer ýchaskesiniń nysanaly maqsatyn baý-baqshaǵa aýystyrdy. Munyń bári zań sheginde múmkin nárse", - deidi Hrapýnov.
2014 jyly bul ýchaske satyp alý-satý negizinde basqa azamatqa aýysyp ketken. Ol tiisti ótinish berip, úi salý úshin osy ýchaskeni paidalanýdyń maqsatyn ózgertýdi suraǵan.
"2015 jyly Almaty ákimdiginiń jer komissiiasynyń qorytyndysy negizinde qala ákiminiń orynbasary Bolat Saýranbaevtyń qolymen Almaty ákimi Baibek tiisti qaýlyǵa qol qoiady. Osylaisha jer ýchaskesiniń nysanaly maqsatyn ózgertedi. Ákim bul qaýlyǵa qol qoiyp, nysanaly maqsatyn ózgertýge quqyǵy joq edi", - deidi Hrapýnov.
8 aqpanda saǵat 02-20-da "Taý Samaly" Medeý aýdany, Olimpiiskaia kóshesiniń boiynda tehnogendik topyraqtyń lailanýy saldarynan lai kóshkini júrgen bolatyn.
Oqiǵa ornynda qutqarýshylar 1984 jyly týǵan er adamnyń, 1980 jyly týǵan áieldiń jáne 2007 jyly týǵan eki jigittiń máiitterin taýyp, alyp shyqty.
