Depýtat Nartai Aralbaiuly "L-kapital" qarjy uiymyna aldanǵandardyń máselesin kóterip, osy iske qatysy bar juldyzdardy da jaýapqa tartýǵa shaqyrdy, - dep habarlaidy Dalanews.kz.
Nartai Aralbaiuly qarjy uiymyna jarnama jasaǵandar qatarynda ónerdegi tanymal adamdar da bar ekenin jetkizdi.
"L-Kapital" aktsionerlik qoǵamynyń "tam-tum teńge salsań taýdai tabys tabasyń" degen jalǵan jarnamasyna aldanǵan adam sany qazir 1451-ge jetti. Jarnama jasap jalaýlatqandardyń sapynda elge tanymal óner juldyzdary da órip júr", - deidi depýtat.
1451 jábirlenýshige keltirilgen shyǵynnyń jalpy kólemi 10 499 000 000 teńge bolady. Al aldanǵandardyń kóbi - zeinetkerler men jalǵyzbasty analar.
"Osynsha qarjyny "L-Kapital"-dyń basshylary izim-ǵaiym joq qyldy dep aryzdanǵan otandastarymyz bul is boiynsha sottyń tym sozbaqqa salynyp ketkenine, prokýratýra organdardyń baiaý áreketine narazy. Bul jerde taǵy bir túitkil bar, "L-Kapital" aktsionerlik qoǵamyna aldanǵandar sany 1451-den áldeqaida kóp. Sebebi aryz jazǵan aǵaiyn qarjylyq quityrqylyqtyń qurbandary sanatynda áskeri bólim qyzmetkerleri, túrli deńgeidegi memlekettik qyzmetkerler, biýdjettik mekeme qyzmetkerleri bar deidi. Biraq olar aryz jazýdan tartynyp otyr, sebebi de túsinikti shyǵar", - deidi Nartai Aralbaiuly.
Depýtat naqty shara qoldanylýyn suraidy.
"Beimálim qarjylyq uiymdar aǵaiyndy aldap, Qazaqstanda qashanǵy alshań basyp júre beredi? Internet alaiaqtyqtyń qurbany bolǵan qandasty qorǵai almasa, qarjylyq piramidanyń qaqpanyn qapqan otandasty arashalai almasa, olardyń qoldy bolǵan aqshasyn qaitara almasa onda quzyrly oryndardyń quzyry ne nársege jetedi degen zańdy suraq týady. Qarapaiym eldiń mobildik aýdarymyna qaraýyl qoiyp qadaǵalap, qajet bolsa shara qoldanamyz dep halyqqa dóń aibat shekken memlekettik organdar shyn urylardy aýyzdyqtaýǵa kelgende sylbyrlyq tanytpaýy kerek", - deidi depýtat.
Nartai Aralbaiuly aryzdy joldaǵan halyq neni talap etip otyrǵanyn da atady:
1. 1451 jábirlenýshiniń aryzynyń negizinde bastalǵan sot protsesi nege sozbaqqa salynyp ketkenin jáne Almaty qalasyndaǵy Bostandyq aýdandyq soty nege Aiyptaý aktisinde naqty aiǵaqtar joq dep isti prokýratýraǵa 3 ret qaitarǵanyn bilgisi keledi?
2. "L-Kapitaldyń" basshylarynan bólek sol ujymǵa aqsha salýǵa adamdardy úgittegen óner juldyzdaryn da zań aldynda jaýapqa tartýdy talap etedi.
