Ádilet ministrligi Qashaǵan jobasyna qatysýshy merdiger kompaniialar halyqaralyq arbitrajǵa júgingenin habarlady. Ministrlik málimetinshe, tiisti ótinim 2026 jylǵy 9 aqpanda Halyqaralyq investitsiialyq daýlardy retteý ortalyǵyna joldanǵan, dep habarlaidy Dalanews.kz.
Qoldanystaǵy Úkimet reglamentiniń 6-tarmaǵyna sáikes, mundai daýlarda memlekettiń múddesin osy iske jaýapty memlekettik organ qorǵaidy. Ol úshin Premer-Ministrdiń, onyń orynbasarynyń nemese Úkimet apparaty basshysynyń arnaiy tapsyrmasy berilýi tiis.
Eske salaiyq, buǵan deiin Qashaǵan ken ornyn igerýge qatysatyn halyqaralyq kompaniialar Qazaqstanǵa qarsy arbitraj rásimin bastaýǵa nietti ekeni habarlanǵan edi. Bul týraly Shell kompaniiasynyń ókili málimdegen.
Nege.Aqsha telegram arnasynyń málimetinshe, daýdyń týyndaýyna kúkirtti saqtaý talaptaryna bailanysty salynǵan 5 mlrd dollar kólemindegi ekologiialyq aiyppul sebep bolǵan. Byltyr jeltoqsanda Astanadaǵy sot Qashaǵan konsortsiýmynyń apelliatsiialyq shaǵymyn keri qaitarǵannan keiin, sheteldik aktsionerler halyqaralyq tórelikke júginý týraly sheshim qabyldaǵan.
Shell ókiliniń aitýynsha, kompaniialar ózderine taǵylǵan aiyptarmen kelispeidi jáne máseleni kelissóz arqyly sheshýge tyrysqan. Alaida bul áreketter nátije bermegen soń, olar halyqaralyq kelisimder aiasynda arbitraj bastaýǵa májbúr bolǵan.
Sonymen qatar derekkóz málimetinshe, Qazaqstan úkimeti de Qashaǵanǵa jaqyn ornalasqan igerilmegen Aqtoty men Qairan ýchaskeleri boiynsha jeke arbitraj protsesin bastaýdy josparlap otyr. Resmi Astana atalǵan ken oryndaryn memleket menshigine qaitarýdy kózdeidi.
