Aqtóbede burynǵy jubaiyn atyp óltirdi dep aiyptalǵan burynǵy qarjy politsiiasy qyzmetkeri Tair Sarsembinge qatysty sot protsesi jalǵasýda. Prokýratýra ony adam óltirý, uryp-soǵý jáne qorqytý baptary boiynsha aiyptap otyr, dep habarlaidy dalanews.kz.
Tergeý málimetinshe, 47 jastaǵy Tair Sarsembin buryn Qarjy politsiiasynda qyzmet etken, keiin «Azamattarǵa arnalǵan úkimet» memlekettik korporatsiiasynyń filialynda qaýipsizdik jónindegi ýákil bolyp jumys istegen.
Aiyptaý aktisine sáikes, onyń qurbany – burynǵy jubaiy, 37 jastaǵy Iýliia Sarsembina. Áielge ańshylyq karabinnen jaqyn qashyqtyqtan eki ret oq atylǵan. Aldyn ala málimet boiynsha, oqiǵa kezinde olardyń 9 jastaǵy qyzy páterdiń syrtynda bolǵan. Tergeý nusqasyna sáikes, ol anasynyń aiqaiyn da, oq atylǵan dybysty da estigen.
Sotta marqumnyń ákesi Evgenii Bondarenko burynǵy kúieý balasynyń qyzy úshin qaita tatýlasýǵa tyrysqanyn aitty. Onyń sózinshe, er adam áielinen birneshe ret keshirim surap, qarym-qatynasty qaita bastaýǵa kóndirgen. Osydan keiin Iýliia oǵan qaita senim arta bastaǵan.
Jábirlenýshi tarap bul qylmys aldyn ala josparlanǵan dep esepteidi. Olardyń aitýynsha, aiyptalýshy oqiǵa bolǵan kúni páterge qyzyn ertip kelip, sol arqyly ishke kirgen. Advokattardyń pikirinshe, balanyń anasynyń qaza tabýyna kýá bolýy oǵan aýyr psihologiialyq soqqy bolǵan.
Qazirgi tańda qyzdyń qamqorlyǵyn Iýliianyń ata-anasy alǵan. Ol Reseide turyp jatyr. Sotta atasy nemeresiniń anasyn qatty saǵynatynyn jáne esikti ákesine ózi ashqany úshin ózin kinálaitynyn aitty.
Sot barysynda aiyptalýshynyń týǵan aǵasy men jeńgesi de jaýap berdi. Olardyń aitýynsha, oqiǵadan keiin Sarsembin qyzyn óz úilerine alyp kelgen. Bala jylap kelgenimen, olar muny ákesiniń urysqanynan dep oilaǵan. Anasynyń qaitys bolǵanyn qyzǵa kelesi kúni ýaqytsha ornalastyrý ortalyǵynda psiholog habarlaǵan.
Aqtóbeniń mamandandyrylǵan qylmystyq ister jónindegi sotynda qaralyp jatqan is boiynsha sot tergeýi jalǵasyp jatyr.
