Shymkent qalasynyń baǵbandary búginde ozyq tehnologıa tásilimen egilgen qarqyndy baýdyń ónimdiligi dástúrli tásilmen egilgen baýdyń ónimdiligine qaraǵanda 1,5-2 esege artqanyna kóz jetkizip otyr. Shymkent qalasynda sońǵy eki jyl kóleminde 135 gektarǵa qarqyndy alma baǵy otyrǵyzylǵan.

Bıyl «D-Sabyr» sharýaqojalyǵy ıntensıvti  baý tásilimen 15 gektar aýmaqqa alma kóshetterin otyrǵyzdy. Bozaryq turǵyn alabynda ornalasqan baý sharýashylyǵyna 100 mln teńge bolatyn ınvestısıa salynǵan. Munda almanyń «Aıdared», «Red delıshes», «Djonagold», «Gloster» syndy túrleri egilgen. Baý sharýashylyǵynda 10 adam turaqty jumyspen qamtylsa, maýsym ýaqytysynda jumysshylar sany artatyn bolady.

Atalǵan jobaǵa ketken shyǵynnyń bir bóligin óteý boıynsha memleket tarapynan 25 mln teńge kóleminde sýbsıdıa bólinip, qoldaý kórsetildi.

Budan bólek, qalada osy jyly ozyq tehnologıany qoldana otyryp ónerkásiptik úlgidegi kólemi 5,7 gektar bolatyn eki jylyjaı kesheni iske qosyldy.