"Qarmet" AQ obektilerinde áreket etken qylmystyq toptar ustaldy, - dep habarlaidy Dalanews.kz Polisia.kz-ke siltep.
Biyl Temirtaýda úsh ret "Qaýipsiz qala" jedel-aldyn alý is-sharasy ótkizildi. Onyń barysynda buryn jasalǵan 23 qylmys ashyldy, izdeýde júrgen 9 qylmysker ustalyp, 3,7 myńnan astam ákimshilik quqyq buzýshylyq anyqtaldy.
"Qarmet" metallýrgiialyq kompaniiasynyń nysandarynda urlyq jáne onyń qyzmetkerlerine qatysty basqa da aýyr qylmystar jasaǵan birneshe uiymdasqan qylmystyq toptardyń joly kesildi. Ótken jyldyń naýryz aiynda "Qarmet" AQ-nyń metall ónimderin urlaýdy jolǵa qoiǵan 40 adamnan turatyn uiymdasqan qylmystyq top jáne onyń kóshbasshysy ustaldy. 2023 jyldyń tamyz aiynda aimaqtaǵy kriminogendik jaǵdaiǵa jáne kompaniianyń qyzmetine teris áser etken uiymdasqan qylmystyq top kóshbasshysy men 27 múshesi quryqtaldy.
– Qylmystyq isterdi tergeý nátijeleri boiynsha olardyń Qaraǵandy oblysynyń aýmaǵynda milliondaǵan jymqyrý, sondai-aq aýyr jáne asa aýyr qylmystar jasaǵany týraly dálelder jinaldy. Tergeý aiaqtaldy. Endi ister prokýrorǵa zertteý jáne ary qarai sotqa jiberý úshin joldanady, – dedi IIM uiymdasqan qylmysqa qarsy kúres departamentiniń ókili Qýandyq Alpys.
Ótken jyldyń jeltoqsan aiynda Qaraǵandy oblysynyń Abai aýdanyndaǵy "Qarmet" kásipornynyń shahterlerin bopsalaýmen ainalysqan uiymdasqan qylmystyq top joiyldy. Biyl sáýir aiynda IIM, UQK jáne Memlekettik kúzet qyzmeti Bas prokýratýranyń úilestirýimen metallýrgiia kombinatynan asa iri mólsherdegi aqsha urlaý boiynsha qylmystyq shemany jolǵa qoiǵan qylmystyq toptyń múshelerin ustady.
– Qylmystyq shema baqylaýdaǵy merdigerlik jáne kúzet uiymdary arqyly joq taýardy jetkizýden turǵan. Shyǵyn 1,5 mlrd teńgeden asady. Ustaý jáne tintý sharalary bir mezgilde Qaraǵandy, Temirtaý jáne Almaty qalalarynda ótkizildi. Kúdiktiler qamaýǵa alyndy. Kásiporyndarda urlyqqa jol bermeý boiynsha jumys erekshe baqylaýda, – dedi Qýandyq Alpys.
