2026 jyldan bastap "Nazarbaev ýniversiteti", Áleýmettik meditsinalyq saqtandyrý qory (ÁMSQ) jáne Astana halyqaralyq qarjy ortalyǵyn (AHQO) qarjylandyrý tetigi qatańdatylady. Bul týraly Joǵary aýditorlyq palata (JAP) resmi málimdeme jasady, dep habarlaidy Dalanews.kz.
"Bilim berý, densaýlyq saqtaý jáne qarjy salalaryndaǵy birqatar kvazimemlekettik uiymdardy qarjylandyrýdyń qoldanystaǵy tártibi 2026 jylǵy 1 qańtardan bastap qatańdatylatyn bolady. Bul sheshim Joǵary aýditorlyq palatanyń usynymdary negizinde qabyldandy. Respýblikalyq biýdjettiń shoǵyrlandyrylǵan qarjylyq esebine júrgizilgen memlekettik aýditten keiin Biýdjet kodeksine tiisti ózgerister engizý protsesi bastaldy", – delingen habarlamada.
Aýditorlar biýdjet qarjysynyń maqsatty salymdar men aýdarymdar arqyly memlekettik emes uiymdarǵa berilýi memleket aktivteriniń qarjylyq esepterde dál ári ashyq kórsetilýine keri áser etetinin anyqtaǵan. Atap aitqanda, bul tásilmen jyl saiyn "Nazarbaev ýniversiteti" men "Nazarbaev Ziiatkerlik mektepteri" siiaqty avtonomdy bilim berý uiymdary, ÁMSQ, AHQO jáne basqa da birqatar uiymdar qarjylandyrylyp kelgen.
Joǵary aýditorlyq palata úkimetke qarjylandyrý tásilin qaita qaraýdy usyndy. Sebebi qazirgi mehanizm memlekettik aktivterdiń ósýine yqpal etpeidi – iaǵni, zańdy tulǵalardyń jarǵylyq kapitaly artpaidy jáne qarajattyń qalai jumsalyp jatqandyǵy da tolyq aiqyn emes.
"Osyǵan bailanysty jańa Biýdjet kodeksinde maqsatty salymdar men aýdarymdar arqyly qarjylandyrý normalary alynyp tastaldy. Onyń ornyna transfertter júiesi engizilýde. Bul transfertter uiymnyń strategiialyq qujattarynda naqty nátijelerge qol jetkizý jospary bolǵan jaǵdaida ǵana beriledi", – delingen habarlamada.
Sondai-aq qarjy jyly ishinde igerilmegen qarajat (keibir zańda kózdelgen jaǵdailardy qospaǵanda) mindetti túrde biýdjetke keri qaitarylýy tiis.
"Transfert alatyn zańdy tulǵalardyń birinshi basshylary memlekettik organdardyń damý josparlarynda, ózderiniń uzaqmerzimdi strategiialarynda jáne biýdjettik baǵdarlamalar pasporttarynda kórsetilgen nátijelerge qol jetkizýge tikelei jaýapty bolady. Sonymen qatar, olar alynǵan qarajatty paidalaný jónindegi esepterdiń negizdiligi men shynaiylyǵy úshin de jaýap beredi", – dep naqtylady JAP.
Jańa tártip 2026 jyldyń 1 qańtarynan bastap kúshine enedi.
