Qarjy vitse-ministri Dáýren Keńbeiil sot sheshimin oryndamaǵany úshin aiyppul arqalady, dep habarlaidy Dalanews.kz.
Protenge telegram arnasynyń málimetinshe, ákimshilik sot vitse-ministrge 78 640 teńge jáne 196 600 teńge kóleminde aiyppul salǵan. Daýdyń bastalýyna memlekettik satyp alý konkýrsyna qatysty kelispeýshilik sebep bolǵan. Konkýrs qujattarymen kelispegen áleýetti jetkizýshi sotqa júginip, is jarty jyldan astam ýaqyt qaralǵan. Nátijesinde sot kásipkerdiń ýájin qoldap, Qarjy ministrligine mundai zańbuzýshylyqtardy qaitalamaý jóninde jeke qaýly joldaǵan.
Mundai jaǵdaida sot memlekettik organnan naqty shara qabyldap, atqarylǵan jumystar týraly esep berýdi talap etedi. Alaida belgilengen merzimde sotqa esep usynylmaǵan. Osyny sot sheshimin oryndamaý ári sotqa qurmetsizdik retinde baǵalaǵan ákimshilik sot vitse-ministrden túsinikteme talap etken. Naqty jaýap bolmaǵandyqtan, oǵan 20 jáne 50 ailyq eseptik kórsetkish kóleminde aiyppul salyndy.
Qańtar aiynyń sońynda Dáýren Keńbeiil aiyppuldardy daýlaýǵa tyrysqanymen, sot onyń ýájderin qanaǵattandyrmady. Sebebi shaǵymdy ministrliktiń múddesin qorǵaityn zańger bergen, al aiyppul vitse-ministrdiń ózine jeke tulǵa retinde salynǵan. Sot aiyppuldy tóleý mindetin kúshinde qaldyrdy.
Osylaisha, vitse-ministr memleket biýdjetine 275 myń teńgeden astam aiyppul tóleýge tiis. Bul jaǵdai kásipkerdiń óz quqyǵyn sot arqyly qorǵaýynan bastalǵan daýdyń naqty saldary boldy.
