Qazaqstanda bank shottary men aýdarymdaryn tekserýdiń jańa erejeleri daiyndalýda, dep habarlaidy Dalanews.kz.
Qarjy ministrligi aktivteri men mindettemeleri týraly deklaratsiia tapsyrýǵa mindetti azamattardyń shottaryndaǵy aqsha qozǵalysyna qatysty málimet berý tártibin naqtylaityn buiryq jobasyn qoǵamdyq talqylaýǵa shyǵardy.
Ne ózgeredi?
Jobaǵa sáikes, ekinshi deńgeili bankter deklaratsiia tapsyratyn jeke tulǵalardyń shottary týraly tolyq málimetti salyq organdaryna berýge mindetteledi. Tizimge myna derekter kiredi:
- shot nómirleri men ondaǵy qaldyq qarajat;
- jyl ishindegi aqsha qozǵalysy;
- atalǵan tulǵalarǵa berilgen nesieler, olardyń ótelgen somasy jáne eseptelgen paiyzdar;
- quny 20 myń AEK-ten asatyn (2025 jyly bul 73 mln teńgeden joǵary) múlikti satyp alýdaǵy shottardaǵy aqsha qozǵalysy.
Qarjy ministrligi mundai jańashyldyqtyń maqsaty – jalpyǵa birdei deklaratsiialaý aiasynda azamattardyń kirisi men múlkine baqylaýdy kúsheitý ekenin atap ótti. Salyq organdary iri mámilelerdi qashyqtan baqylap, olardy deklaratsiiadaǵy derektermen salystyra alady. Bul ádis ádil salyq salýdy qamtamasyz etip, biýdjet túsimin kóbeitýge jáne kóleńkeli ekonomikany qysqartýǵa septigin tigizedi dep boljanýda.
Buǵan deiin bankter salyq organdaryna tek jalpy málimet – shottar men nesieler týraly aqparat beretin. Endi jańa Salyq kodeksiniń normalaryna sáikes bul tizim naqtylanyp, keńeitilýde. Jobada kórsetilgendei, bul ózgerister azamattarǵa qosymsha qaýip tóndirmeidi, kerisinshe baqylaýdyń ashyqtyǵyn arttyrýǵa baǵyttalǵan.
