Qaraǵandyda ózin "emshi" ári "balger" retinde tanystyrǵan úsh áiel 78 jastaǵy zeinetkerdi aldap, onyń 15 million teńge turatyn altyn buiymdary men aqshasyn iemdenip ketken, dep habarlaidy dalanews.kz.
Oqiǵa byltyr jeltoqsanda bolǵan. Úiine qaityp bara jatqan qariiaǵa kóshede úsh beitanys áiel jolyǵyp, áńgimege tartqan. Alǵashynda olar stomatologiiaǵa aparatyn joldy surap, keiin zeinetkerdiń senimine kirip, psihologiialyq qysym kórsetýge kóshken. Kúdiktilerdiń biri áielge "jaqyn adamy salǵan eski qarǵys bar" ekenin aityp, ony dereý qaitarmasa, ózine qymbat adamnyń ómirine qaýip tónetinin jetkizgen. Osyndai úreili sózderge sengen zeinetker alaiaqtardyń árbir nusqaýyn buljytpai oryndaǵan.
Áielder aldymen "tazartatyn ine" satyp alýdy usynyp, túrli yrym-joralǵylardy jasaǵan. Keiin úiinen shiki jumyrtqa ákelýdi surap, sońynda qarǵystan arylý úshin barlyq altyn buiymy men aqshasyn gazetke orap berýdi talap etken. Óz kezeginde olar mórlengen túiinshek ustatyp, ony 40 kún ótken soń ǵana ashyp, ishindegisin órtep, kúlin sol jerge ákelý kerektigin aitqan.
Alaida sol túni-aq kúmándanǵan zeinetker túiinshekti ashyp kórgende, ishinde bos qaǵaz ǵana jatqanyn baiqaǵan.
Tergeý barysynda kúdiktiler Pavlodar jáne Almaty qalalarynyń, sondai-aq, Jetisý oblysynyń turǵyndary ekeni anyqtaldy. Jedel aqparat negizinde kúdiktiler Temirtaý qalasynda júrgeni belgili bolyp, olar ustaldy.
"Qazir bul derek boiynsha tergeý áreketteri júrgizilip jatyr. Kúdiktiler ýaqytsha ustaý izoliatoryna qamaldy", - dedi politsiia.
