Qaraǵandyda kópsalaly aýrýhanalardyń birinen túnde órt shyǵyp, 20 naýqas qaýipsiz jerge kóshirildi, dep habarlaidy dalanews.kz.
Tótenshe jaǵdailar ministrliginiń málimetinshe, aldymen aýrýhana aýmaǵynda jinalǵan qaǵaz qaldyqtary tutanǵan. Keiin jalyn bes qabatty negizgi ǵimaratqa japsarlas salynǵan bir qabatty kireberistiń aǵash shatyr qurylymyna taraǵan.
Oqiǵa ornyna jetken qutqarýshylar aýrýhana ákimshiligimen birlesip, 20 naýqasty ǵimarattyń kórshiles bóligine evakýatsiialady.
Órt sóndirýshiler jalynnyń aýrýhananyń negizgi jáne oǵan japsarlas ǵimarattaryna taralýyna jol bermedi. Órt 25 sharshy metr aýmaqta tolyq sóndirildi.
Oqiǵadan zardap shekkender joq. Qazirgi ýaqytta órttiń shyǵý sebebi anyqtalyp jatyr.
