Jańa Qaraǵandy – Jezqazǵan respýblikalyq avtojolynyń Jańaarqadan Qaraǵandy baǵytyna qarai sozylǵan ýchaskesinde qurylys jumystarynyń daiyndyq kezeńi qarqyndy jalǵasyp jatyr. Qazirgi ýaqytta merdiger uiymdar bolashaq avtojoldyń negizin daiyndaý jumystaryna kirisken, dep habarlaidy dalanews.kz.
Jańa respýblikalyq mańyzy bar avtojoldyń jalpy uzyndyǵy 457 shaqyrymdy quraidy. Onyń 122 shaqyrymy Qaraǵandy oblysynyń aýmaǵy arqyly ótedi. II tehnikalyq sanatqa jatatyn eki jolaqty jańa trassa qoldanystaǵy jolmen qatar salynyp jatyr jáne paidalanýǵa berilgennen keiin qaýipsizdik pen sapaǵa qoiylatyn zamanaýi talaptarǵa tolyq sáikes bolady.
Búginde nysanda qurylys jumystarynyń daiyndyq kezeńi júrgizilýde. Merdigerler jekelegen ýchaskelerde qunarly topyraq qabatyn alyp tastap, jol tóseminiń negizin josparlaý jáne nyǵyzdaý jumystaryn atqarýda. Sonymen qatar geologiialyq jáne geodeziialyq izdestirý jumystary júrgizilip jatyr.
Buǵan qosa, vahtalyq qalashyqtar men óndiristik bazalar ornalasatyn alańdar ázirlenip, qurylys tehnikasyn, jabdyqtar men mamandardy jumyldyrý jalǵasýda.
Jobanyń tapsyrys berýshisi – «QazAvtoJol» UK» AQ.
Jobanyń basty ereksheligi – DBM modeliniń qoldanylýy. Bul modelge sáikes merdiger nysannyń búkil ómirlik tsikline jaýap beredi: jobalaý men qurylys jumystarynan bastap, jol paidalanýǵa berilgennen keiingi jeti jyl boiy ony kútip-ustaýǵa deiin. Mundai tásil qurylys jumystarynyń sapasyn arttyrýǵa, jobanyń qymbattaýy men merziminiń keshigý táýekelderin barynsha azaitýǵa, sondai-aq jobany tiimdi júzege asyrýǵa múmkindik beredi.
Qaraǵandy – Jezqazǵan avtojolyn qaita jańǵyrtý Qazaqstannyń kólik infraqurylymy úshin strategiialyq mańyzǵa ie. Qurylys aiaqtalǵannan keiin jańa trassa elimizdiń ortalyq, soltústik jáne ońtústik óńirlerin ózara bailanystyratyn mańyzdy kólik dálizine ainalady. Sonyń nátijesinde jol qozǵalysynyń qaýipsizdigi artyp, avtojoldyń ótkizý qabileti ulǵaiady, sondai-aq turǵyndar men júk tasymaldaýshylardyń jol júrý ýaqyty edáýir qysqarady.
Avtokólik qozǵalysyn ashý jekelegen ýchaskelerdiń daiyn bolýyna qarai kezeń-kezeńimen júzege asyrylady. Al jańa Qaraǵandy – Jezqazǵan avtojolynyń qurylysyn tolyq aiaqtaý 2029 jylǵa josparlanǵan.
