Qarmet kompaniiasynyń «Shahtinsk» shahtasynda jańa FS 400 óndirý kombainyn montajdaý jumystary aiaqtalýǵa jaqyn. Zamanaýi taý-ken tehnikasy óndirý zaboilarynda kómirdi eki baǵytta kesýge jáne tieýge arnalǵan. Jaqyn ýaqytta jabdyq 16 D1–D2 lavasynda paidalanýǵa beriledi. Bul ýchaskedegi kómir qory 500 myń tonnadan asady, dep habarlaidy dalanews.kz.
FS 400 joǵary ónimdiligimen jáne zamanaýi tehnikalyq sheshimderimen erekshelenedi. Onyń elektrqozǵaltqyshtarynyń jalpy qýaty 780 kVt, al qorektenýi 1140 V kerneýli jeliden júzege asyrylady. Kombain berilis qozǵaltqyshtarynyń jiilik arqyly retteletin júiesimen jabdyqtalǵan, bul jumystyń birqalypty ári tiimdi júrýin qamtamasyz etedi. Qurylymynda shetkalyq toraptyń bolmaýy jabdyqtyń qyzmet etý merzimin uzartyp, tehnikalyq qyzmet kórsetý shyǵyndaryn azaitady.
«SL 300 kombainymen salystyrǵanda jańa mashinanyń qýaty eki ese artqan. FS 400 qabat biiktigi 0,9-dan 4 metrge deiingi jaǵdaida óndirý jumystaryn júrgizýge múmkindik beredi, al onyń qozǵalys jyldamdyǵy minýtyna 23 metrge jetedi. Bul kómir óndirý qarqynyn aitarlyqtai arttyrýǵa múmkindik beredi», — dep atap ótti montaj-demontaj ýchaskesiniń mehanik orynbasary Ardaq Altai.
Kombaindy ázirleý kezinde avtomattandyrý men ónerkásiptik qaýipsizdikke erekshe kóńil bólingen. Mashinany Bluetooth tehnologiiasy arqyly jumys isteitin radiopýltterdiń kómegimen qashyqtan basqarýǵa bolady. Bul kombainerge qaýipti aimaqtan tireý sektsiialarynyń on bóligine deiingi qashyqtyqta jumys isteýge múmkindik beredi, sonyń arqasynda óndiristik jaraqat alý qaýpi tómendeidi.
«Jańa mashinada derekterdi joǵary jyldamdyqpen jetkizýdi jáne barlyq júielerdiń turaqty jumysyn qamtamasyz etetin zamanaýi protsessorlar qoldanylǵan. Negizgi fýnktsiialardyń barlyǵy qashyqtan basqarý pýltinde qoljetimdi, sondyqtan kombainerge magnittik stantsiiaǵa únemi barýdyń qajeti joq. Barlyq qajetti parametrler ekranda kórsetiledi. Sonymen qatar qorǵanys júieleri qarastyrylǵan: shamadan tys júkteme týyndaǵan jaǵdaida avtomatika ózdiginen áreket etip, yqtimal aqaýlardyń aldyn alady», — dedi «Shahtinsk» shahtasynyń bas mehanik orynbasary Vladimir Pojidaev.
Jetildirilgen monitoring júiesi naqty ýaqyt rejiminde jabdyqtyń negizgi jumys parametrlerin — kerneýdi, tok kúshin, týyndaityn qateler men yqtimal júktemelerdi kórsetedi. Bul mamandarǵa tehnikanyń jaǵdaiyn jedel baqylap, qajetti sharalardy ýaqytyly qabyldaýǵa múmkindik beredi. Sonymen qatar kombain kórsetkishteri Qarmet Kómir departamentiniń dispetcherlik-taldaý ortalyǵyna da tikelei shyǵarylady.
Qaýipsizdikti arttyrý jáne eńbek jaǵdailaryn jaqsartý maqsatynda shań basý júiesi jańartyldy. Sýarý shyǵyny minýtyna 280 litr, bul óndirý kenjarynda shań deńgeiin edáýir tómendetedi. Kombainnyń búkil uzyndyǵy boiyna avariialyq toqtatý saqinaly qurylǵylary ornatylǵan, tótenshe jaǵdai týyndaǵanda jaqyn mańdaǵy kez kelgen jumysshy jabdyqty birden toqtata alady.
Sonymen qatar kombainnyń lavamen qozǵalý júiesi jetildirilip, mashinanyń senimdiligi men kómir óndirý tiimdiligi arttyryldy. Qazirgi ýaqytta óndirýshi kompaniianyń mamandary iske qosý-baptaý jumystaryn júrgizip, shahta qyzmetkerlerin jańa jabdyqty paidalaný jáne tehnikalyq qyzmet kórsetýge úiretýde. Bul jumystar aiaqtalǵannan keiin kombain bólshektelip, jer astyna túsirilip, tikelei óndirý zaboiynda qaita qurastyrylady.
Qarmet kómir kásiporyndaryn tehnikalyq jańǵyrtý júieli túrde júzege asyrylýda. Buǵan deiin kompaniianyń basqa shahtalaryna taý-ken qazbalaryn daiyndaýǵa arnalǵan KP-21 úńgý kombaindary jáne tómengi klastaǵy FS 300 óndirý kombainy jetkizilgen bolatyn.
Jańa tehnikany paidaǵa berý — Qarmet shahtalaryn aýqymdy jańǵyrtýdyń kezekti kezeńi. Bul jabdyq kómir óndirý ónimdiligin arttyrýǵa, ónerkásiptik qaýipsizdikti kúsheitýge jáne jańa ýchaskede kómir qorlaryn tiimdi igerýge múmkindik beredi.
