Qaraǵandy oblysy Doskei aýylynyń turǵyndary bastaýysh synyp muǵalimi Almagúl Nábievanyń áreketinen zardap shekkenderin jetkizdi. Aitýlarynsha, ustaz aýyl turǵyndarynan qaryzǵa aqsha alyp, olardyń atyna nesie rásimdegen. Qaryzdyń jalpy somasy 70 million teńgeden asqan. Alaida Nábieva bul iste kúdikti emes, jábirlenýshi retinde tanylǵan, dep habarlaidy Dalanews.kz.
“Qazirgi tańda zardap shekkender sany 15-ke jýyq, biraq shyn máninde 40 adam bolýy múmkin. Bárimizdiń basymyzǵa túsken aýyr jaǵdai bir adamnyń senimimizdi paidalanýynan bastaldy. Bastaýysh synyp muǵalimi, ári aýyl mektebiniń direktorynyń qyzy Nábieva “otbasylyq qiyn jaǵdaiǵa tap boldym” degen syltaýmen bir jyl boiy bizden aqsha surap, atymyzǵa nesie rásimdetip otyrdy. Biz – qarapaiym aýyl turǵyndarymyz, al ol – balalarymyzdyń ustazy. Sol sebepti senip qaldyq”, — deidi zardap shekkenderdiń biri.
Aryzdanýshylardyń sózinshe, Nábievanyń ákesi keibirimen janashyrlyq tanytyp sóilesse, endi bireýlerimen bankke baryp, nesie rásimdeýge kómektesken kórinedi. Nátijesinde jinalǵan qaryz kólemi ondaǵan, tipti júzdegen million teńgege jetken. Nábieva bul qarajatty turǵyndarǵa qaitarmaǵan.
“Biz politsiiaǵa aryz túsirdik. Qazir qylmystyq is qozǵaldy. Alaida bizge túsiniksiz sebeptermen Nábieva bul iste kúdikti emes, kerisinshe jábirlenýshi retinde tanyldy. Is materialdarynda barlyq aqshany Nábieva óz jigitine bergeni kórsetilipti. Ol jigit býkmekerlik keńselerge aqsha tigip júrgen, qazir ol negizgi kúdikti. Biraq biz ony múlde tanymaimyz”, — deidi aryzdanýshylar.
Aýyl turǵyndary Nábieva bireýlerdiń qorǵaýynda bolýy múmkin dep kúdiktenedi.
“Óitkeni zardap shekken biz bolsaq, qalaisha ol jábirlenýshi bolady? Apelliatsiialyq sotta sýdianyń ózi istiń shiki ekenin aityp, tereńirek qarastyrýdy surady. Biraq soǵan qaramastan, Nábievanyń protsesstegi mártebesi áli ózgergen joq”, — deidi jábirlenýshiler.
Sózderinshe, olardyń alańdaýshylyǵy arta túsken. Sebebi jańa oqý jyly bastalýǵa jaqyn. Al Nábieva mektepke qaita oralyp, balalarǵa sabaq bermek.
“Biz muny ádiletsiz dep sanaimyz. Ol eshteńege muqtaj emes, ómirin ýaiymsyz jalǵastyryp jatyr. Al biz she? Bizdiń moinymyzda áli de nesie bar. Bireýleriniń otbasy kúirep jatyr. Bireýler tipti óz-ózine qol salmaq boldy”, — deidi olar.
Aýyl halqy Buqar jyraý aýdandyq prokýratýrasyna baryp, shaǵymyn jetkizgen.
“Bizge “másele sheshiledi” dep ýáde berildi. Biraq senim joq. Sol sebepti osy beineúndeýdi jazyp otyrmyz. Biz ádildik talap etemiz! Nábieva qalai jábirlenýshi bolmaq? Jábirlenýshi – biz! Qarapaiym, sengish halyqtyń senimin taptap ketti. Al ol esh ókinish bildirmei, esh jaýapkershilik sezinbei, ómirin burynǵydai jalǵastyryp keledi.
Biz Qazaqstan Respýblikasynyń Ishki ister ministrliginen jáne Bas prokýratýrasynan osy iske nazar aýdaryp, naǵyz kinálilerdi jaýapqa tartýdy talap etemiz”, — dedi turǵyndar.
