Qaraǵandy oblystyq politsiia departamentiniń habarlaýynsha, Threads áleýmettik jelisinde ultaralyq arazdyqty qozdyratyn jazba jariialaǵan 22 jastaǵy qala turǵyny ustalyp, qamaýǵa alyndy, dep habarlaidy Dalanews.kz.
Áleýmettik jelilerge monitoring júrgizý barysynda politsiia qyzmetkerleri Karaǵandy qalasynyń 22 jastaǵy turǵyny Threads platformasynda ultaralyq alaýyzdyq belgileri bar jazba jariialaǵanyn anyqtaǵan. Atalǵan derek boiynsha Qylmystyq kodekstiń 174-babynyń 1-bóligine (ulttyq, áleýmettik, dini alaýyzdyqty qozdyrý) sáikes sotqa deiingi tergeý bastaldy.
"Tergeý barysynda kúdiktiniń elden ketýge daiyndalyp jatqany belgili boldy. Osyǵan bailanysty politsiia sotqa ony qamaýǵa alý týraly ótinish berdi. 22 shildede Qaraǵandy qalasynyń tergeý soty bul ótinishti qanaǵattandyryp, kúdiktini eki ai merzimge ýaqytsha ustaý izoliatoryna qamaý týraly sheshim shyǵardy", – delingen departament habarlamasynda.
Eger kúdiktiniń kinási dáleldense, oǵan 2000-nan 7000 AEK (7 863 000 – 27 524 000 teńge) kóleminde aiyppul nemese eki jyldan jeti jylǵa deiin bas bostandyǵyn shekteý ne aiyrý jazasy taǵaiyndalýy múmkin.
Qazirgi ýaqytta sotqa deiingi tergeý amaldary jalǵasýda, tiisti saraptamalar taǵaiyndaldy. Onyń qorytyndysy boiynsha naqty protsessýaldyq sheshim qabyldanatyn bolady.
Aita keteiik, buǵan deiin atalǵan azamatshanyń jazbasy áleýmettik jelilerde qyzý talqylanǵan edi. Kóptegen qoldanýshylar onyń sózderin arandatýshylyq jáne qorlaýshy dep baǵalady. Keiin ol óz málimdemeleri úshin kópshilik aldynda keshirim surap, videoúndeý jariialaǵan bolatyn.
