قاراعاندى وبلىستىق پوليسيا دەپارتامەنتىنىڭ حابارلاۋىنشا، Threads الەۋمەتتىك جەلىسىندە ۇلتارالىق ارازدىقتى قوزدىراتىن جازبا جاريالاعان 22 جاستاعى قالا تۇرعىنى ۇستالىپ، قاماۋعا الىندى، دەپ حابارلايدى Dalanews.kz.

الەۋمەتتىك جەلىلەرگە مونيتورينگ جۇرگىزۋ بارىسىندا پوليسيا قىزمەتكەرلەرى كاراعاندى قالاسىنىڭ 22 جاستاعى تۇرعىنى Threads پلاتفورماسىندا ۇلتارالىق الاۋىزدىق بەلگىلەرى بار جازبا جاريالاعانىن انىقتاعان. اتالعان دەرەك بويىنشا قىلمىستىق كودەكستىڭ 174-بابىنىڭ 1-بولىگىنە (ۇلتتىق، الەۋمەتتىك، ءدىني الاۋىزدىقتى قوزدىرۋ) سايكەس سوتقا دەيىنگى تەرگەۋ باستالدى.

"تەرگەۋ بارىسىندا كۇدىكتىنىڭ ەلدەن كەتۋگە دايىندالىپ جاتقانى بەلگىلى بولدى. وسىعان بايلانىستى پوليسيا سوتقا ونى قاماۋعا الۋ تۋرالى ءوتىنىش بەردى. 22 شىلدەدە قاراعاندى قالاسىنىڭ تەرگەۋ سوتى بۇل ءوتىنىشتى قاناعاتتاندىرىپ، كۇدىكتىنى ەكى اي مەرزىمگە ۋاقىتشا ۇستاۋ يزولياتورىنا قاماۋ تۋرالى شەشىم شىعاردى"، – دەلىنگەن دەپارتامەنت حابارلاماسىندا.

ەگەر كۇدىكتىنىڭ كىناسى دالەلدەنسە، وعان 2000-نان 7000 اەك (7 863 000 – 27 524 000 تەڭگە) كولەمىندە ايىپپۇل نەمەسە ەكى جىلدان جەتى جىلعا دەيىن باس بوستاندىعىن شەكتەۋ نە ايىرۋ جازاسى تاعايىندالۋى مۇمكىن.

قازىرگى ۋاقىتتا سوتقا دەيىنگى تەرگەۋ امالدارى جالعاسۋدا، ءتيىستى ساراپتامالار تاعايىندالدى. ونىڭ قورىتىندىسى بويىنشا ناقتى پروسەسسۋالدىق شەشىم قابىلداناتىن بولادى.

ايتا كەتەيىك، بۇعان دەيىن اتالعان ازاماتشانىڭ جازباسى الەۋمەتتىك جەلىلەردە قىزۋ تالقىلانعان ەدى. كوپتەگەن قولدانۋشىلار ونىڭ سوزدەرىن ارانداتۋشىلىق جانە قورلاۋشى دەپ باعالادى. كەيىن ول ءوز مالىمدەمەلەرى ءۇشىن كوپشىلىك الدىندا كەشىرىم سۇراپ، ۆيدەوۇندەۋ جاريالاعان بولاتىن.