Qaraǵandyda aiazda kósheden tabylǵan sábi anasyna qaitarylýy múmkin. Bul týraly qalanyń qorǵanshylyq jáne qamqorshylyq bólimi málimdedi, - dep habarlaidy Dalanews.kz "Patriot" Telegram-arnasyna silteme jasap.
Vedomstvo málimetinshe,náresteniń 22 jastaǵy anasynyń psihikalyq jaǵdaiyna saraptama júrgizilip jatyr.
"Eger ol ózin-ózi basqara alamaǵany nemese kúshti dári-dármek áserinde bolǵany nemese baladan qutylý úshin oǵan qandai da bir qysym jasalǵany anyqtalsa, onda oǵan bala qaitarylýy múmkin. Nemese ol ata-ana quqyǵynan aiyrylýy múmkin. Ázirge onyń is-áreketine zańdy baǵa berilmegen. Eger ol náresteni sanaly túrde tastap ketkeni jáne tárbielegisi kelmeitini anyqtalsa, onda náreste qaitarylmaidy. Ol náreste úiine beriledi. Al eseigen kezde balalar úiine aýystyrylady", - dep habarlady "Qaraǵandy bilim bólimi" qorǵanshylyq jáne qamqorshylyq bólimi.
Sondai-aq, vedomstvo teoriialyq turǵydan balany basqa niettiler de asyrap ala alatynyn jetkizdi.
"Balanyń mártebesi áli anyqtalǵan joq. Eger "jetim", "bas tartý" mártebesi anyqtalsa, onda ol asyrap alýǵa qoiylady. Ázirge biz bala asyrap alý úshin úmitker qarastyra almaimyz. Barlyǵy zań boiynsha bolýy kerek", - dep málimdedi bilim bólimi.
Qazirgi ýaqytta bala balalar aýrýhanasynda tekserilip jatyr. Sonymen qatar, 22 jastaǵy áiel men 29 jastaǵy er adamǵa qatysty qylmystyq is júrip jatyr.
Eske salaiyq, Qaraǵandyda er adam 24 aqpanda keshki saǵat 10-da kópqabatty úidiń kireberisiniń janynan ótip bara jatyp kórpege oralǵan jerde jatqan balany kórgen. 28 aqpanda politsiia náresteniń 22 jastaǵy anasy men onyń 29 jastaǵy ákesiniń ustalǵany týraly habarlady.
