Jýyrda Vashingtonda Qaraǵandy–Jezqazǵan avtojolyn qarjylandyrý týraly kelisimge qol qoiyldy. Uzyndyǵy 457 shaqyrymdy quraityn jol qurylysyna 650 mlrd teńge kóleminde qaryz tartylmaq.Qazaq Expert Club sarapshylary bul jobanyń Qazaqstandaǵy logistika men investitsiialyq ahýalǵa yqpalyn baǵalady, dep habarlaidy Dalanews.kz.
Logistikaǵa serpin beretin joba
Kólik logistika salasynyń sarapshysy Ainur Diveevanyń pikirinshe, jańa jol Ortalyq Qazaqstandaǵy kólik bailanysynyń álsiz tustaryn tolyqtyrady.
"Bul marshrýt Ortalyq Qazaqstandaǵy negizgi "aqaýlardyń" birin jabady. Óńirdegi ónerkásiptik aimaqtar arasyndaǵy kólik bailanysy áli de álsiz. Ásirese, taý-ken jáne metallýrgiia salasy úshin mańyzdy. Jol sapasynyń jaqsarýy shikizat pen daiyn ónimdi tasymaldaýdy jedeldetip, az ǵana baǵytqa táýeldilikti tómendetedi", – deidi sarapshy.
Onyń aitýynsha, mundai infraqurylymdyq jobalar júk jetkizý ýaqytyn 20–30%-ǵa deiin qysqartyp, biznes shyǵyndaryn 10–15%-ǵa azaitýy múmkin. Bul óz kezeginde óńirdiń investitsiialyq tartymdylyǵyn arttyrady.
Avtojol – ikemdilikti arttyrady
Sarapshy temirjol jappai júk tasymalynyń negizgi arqaýy bolyp qala beretinin atap ótti. Degenmen jańa avtojol logistikaǵa ikemdilik beredi.
Bul ishki naryqtaǵy júk aǵyndaryn jedel qaita bólýge múmkindik jasap, temirjol jelilerine túsetin júktemeni azaitady.
Halyqaralyq qarjylandyrý
Qarjy sarapshysy Venera Janalina jobanyń investitsiialyq mańyzyna erekshe toqtaldy.
"Halyqaralyq qaita qurý jáne damý banki men Aziia infraqurylymdyq investitsiialar banki siiaqty institýttardyń qatysýy – jobanyń sapasy joǵary ekenin jáne halyqaralyq qarjylandyrý talaptaryna sai keletinin kórsetedi", – deidi ol.
Sarapshynyń sózinshe, bul joba investorlar úshin oń qadam.
Jol qysqaryp, ýaqyt únemdeledi
Aziia infraqurylymdyq investitsiialar bankiniń baǵalaýyna sáikes, Qaraǵandy–Jezqazǵan baǵyty boiynsha jol júrý ýaqyty 1,1 saǵatqa qysqarady. Iaǵni 6,64 saǵattan 5,53 saǵatqa deiin tómendeidi.
Bul kólik shyǵyndaryn azaityp, ýaqyt tiimdiligin arttyrady.
Saýda kólemi artýy múmkin
Dúniejúzilik bank derekterine sáikes, osy baǵyttaǵy eksport-import tasymaly 2022 jylǵy 67 myń tonnadan 2030 jylǵa qarai 358 myń tonnaǵa deiin ósýi yqtimal.
Alaida qosymsha infraqurylym ýaqtyly damymasa, bul kórsetkish shamamen 212 myń tonna deńgeiinde qalýy múmkin.
Óńirdegi shyǵyn máselesi
Qazirgi tańda Ulytaý óńirinde logistikalyq shyǵyndar ónim qunynyń 20%-dan astamyn quraidy. Bul naryqqa shyǵý múmkindigin shektep otyr.
Jańa jol iske qosylsa, shamamen 1,36 mln adam onyń igiligin kórmek.
Tiimdilik
Sarapshylar jobanyń tiimdiligi tek jol salýmen shektelmeitinin eskertti.
Ol úshin qoima infraqurylymy, servistik ortalyqtar men tsifrlyq sheshimder qatar damýy qajet.
"Jalpy, bul – ishki logistikanyń turaqtylyǵyn arttyratyn, bizneske kedergilerdi azaitatyn oryndy joba. Alaida onyń tranzittik áleýetke áseri shekteýli jáne búkil kólik júiesiniń keshendi damýyna bailanysty", – dep túiindedi Ainýr Diveeva.
