جۋىردا ۆاشينگتوندا قاراعاندى–جەزقازعان اۆتوجولىن قارجىلاندىرۋ تۋرالى كەلىسىمگە قول قويىلدى. ۇزىندىعى 457 شاقىرىمدى قۇرايتىن جول قۇرىلىسىنا 650 ملرد تەڭگە كولەمىندە قارىز تارتىلماق.Qazaq Expert Club ساراپشىلارى بۇل جوبانىڭ قازاقستانداعى لوگيستيكا مەن ينۆەستيسيالىق احۋالعا ىقپالىن باعالادى، دەپ حابارلايدى Dalanews.kz.

لوگيستيكاعا سەرپىن بەرەتىن جوبا

كولىك لوگيستيكا سالاسىنىڭ ساراپشىسى اينۇر ديۆەيەۆانىڭ پىكىرىنشە، جاڭا جول ورتالىق قازاقستانداعى كولىك بايلانىسىنىڭ ءالسىز تۇستارىن تولىقتىرادى.

"بۇل مارشرۋت ورتالىق قازاقستانداعى نەگىزگى "اقاۋلاردىڭ" ءبىرىن جابادى. وڭىردەگى ونەركاسىپتىك ايماقتار اراسىنداعى كولىك بايلانىسى ءالى دە ءالسىز. اسىرەسە، تاۋ-كەن جانە مەتاللۋرگيا سالاسى ءۇشىن ماڭىزدى. جول ساپاسىنىڭ جاقسارۋى شيكىزات پەن دايىن ءونىمدى تاسىمالداۋدى جەدەلدەتىپ، از عانا باعىتقا تاۋەلدىلىكتى تومەندەتەدى"، – دەيدى ساراپشى.

ونىڭ ايتۋىنشا، مۇنداي ينفراقۇرىلىمدىق جوبالار جۇك جەتكىزۋ ۋاقىتىن 20–30%-عا دەيىن قىسقارتىپ، بيزنەس شىعىندارىن 10–15%-عا ازايتۋى مۇمكىن. بۇل ءوز كەزەگىندە ءوڭىردىڭ ينۆەستيسيالىق تارتىمدىلىعىن ارتتىرادى.

اۆتوجول – يكەمدىلىكتى ارتتىرادى

ساراپشى تەمىرجول جاپپاي جۇك تاسىمالىنىڭ نەگىزگى ارقاۋى بولىپ قالا بەرەتىنىن اتاپ ءوتتى. دەگەنمەن جاڭا اۆتوجول لوگيستيكاعا يكەمدىلىك بەرەدى.

بۇل ىشكى نارىقتاعى جۇك اعىندارىن جەدەل قايتا بولۋگە مۇمكىندىك جاساپ، تەمىرجول جەلىلەرىنە تۇسەتىن جۇكتەمەنى ازايتادى.

حالىقارالىق قارجىلاندىرۋ

قارجى ساراپشىسى ۆەنەرا جانالينا جوبانىڭ ينۆەستيسيالىق ماڭىزىنا ەرەكشە توقتالدى.

"حالىقارالىق قايتا قۇرۋ جانە دامۋ بانكى مەن ازيا ينفراقۇرىلىمدىق ينۆەستيسيالار بانكى سياقتى ينستيتۋتتاردىڭ قاتىسۋى – جوبانىڭ ساپاسى جوعارى ەكەنىن جانە حالىقارالىق قارجىلاندىرۋ تالاپتارىنا ساي كەلەتىنىن كورسەتەدى"، – دەيدى ول.

ساراپشىنىڭ سوزىنشە، بۇل جوبا ينۆەستورلار ءۇشىن وڭ قادام.

جول قىسقارىپ، ۋاقىت ۇنەمدەلەدى

ازيا ينفراقۇرىلىمدىق ينۆەستيسيالار بانكىنىڭ باعالاۋىنا سايكەس، قاراعاندى–جەزقازعان باعىتى بويىنشا جول ءجۇرۋ ۋاقىتى 1،1 ساعاتقا قىسقارادى. ياعني 6،64 ساعاتتان 5،53 ساعاتقا دەيىن تومەندەيدى.

بۇل كولىك شىعىندارىن ازايتىپ، ۋاقىت تيىمدىلىگىن ارتتىرادى.

ساۋدا كولەمى ارتۋى مۇمكىن

دۇنيەجۇزىلىك بانك دەرەكتەرىنە سايكەس، وسى باعىتتاعى ەكسپورت-يمپورت تاسىمالى 2022 جىلعى 67 مىڭ توننادان 2030 جىلعا قاراي 358 مىڭ تونناعا دەيىن ءوسۋى ىقتيمال.

الايدا قوسىمشا ينفراقۇرىلىم ۋاقتىلى دامىماسا، بۇل كورسەتكىش شامامەن 212 مىڭ توننا دەڭگەيىندە قالۋى مۇمكىن.

وڭىردەگى شىعىن ماسەلەسى

قازىرگى تاڭدا ۇلىتاۋ وڭىرىندە لوگيستيكالىق شىعىندار ءونىم قۇنىنىڭ 20%-دان استامىن قۇرايدى. بۇل نارىققا شىعۋ مۇمكىندىگىن شەكتەپ وتىر.

جاڭا جول ىسكە قوسىلسا، شامامەن 1،36 ملن ادام ونىڭ يگىلىگىن كورمەك.

تيىمدىلىك

ساراپشىلار جوبانىڭ تيىمدىلىگى تەك جول سالۋمەن شەكتەلمەيتىنىن ەسكەرتتى.

ول ءۇشىن قويما ينفراقۇرىلىمى، سەرۆيستىك ورتالىقتار مەن سيفرلىق شەشىمدەر قاتار دامۋى قاجەت.

"جالپى، بۇل – ىشكى لوگيستيكانىڭ تۇراقتىلىعىن ارتتىراتىن، بيزنەسكە كەدەرگىلەردى ازايتاتىن ورىندى جوبا. الايدا ونىڭ ترانزيتتىك الەۋەتكە اسەرى شەكتەۋلى جانە بۇكىل كولىك جۇيەسىنىڭ كەشەندى دامۋىنا بايلانىستى"، – دەپ تۇيىندەدى اينۋر ديۆەيەۆا.