Aımaqta qýattylyǵy jylyna 30 myń tonna qus etin óndiretin bir ǵana «OTAN Green Food» kásiporny bar. Ol ótken 2021 jyly tolyq qýattylyǵynyń jartysyn, ıaǵnı 13 myń tonna ónim óndirip, 2020 jylmen salystyrǵanda 7,5 esege artyq kórsetkishke qol jetkizgen bolatyn. Nátıjesinde, aǵymdaǵy jyldyń 8 aıynda qus fabrıkasynyń ónim kólemi 15,7 myń tonnany qurap, ótken jyldyń sáıkes kezeńimen salystyrǵanda 2 esege artyq boldy.
Aldaǵy ýaqytta qýattylyǵy jylyna 35 myń tonna ónim jáne 33,5 mıllıardtan astam ınvestısıa quıylatyn broıler etin ósirý, soıý jáne óńdeý boıynsha tolyq sıkldi qamtıtyn «Prıma Qus» qus fabrıkasynyń qurylysy júrgizilýde. Kásiporyn iske qosylǵanda 580 jumys orny ashylady dep kútilýde. Bul óz kezeginde 600-ge jýyq aýdan turǵynynyń jumys isteýine múmkindik beredi. Jospar boıynsha joba aǵymdaǵy jyldyń qarasha aıynda paıdalanýǵa beriledi dep kútilýde.
– Ónim óndirgende ózimizdi ǵana qamtamasyz etip qoımaı, eksportqa jetkizýdi de júzege asyra alamyz. Osyǵan oraı, oblys ákiminiń orynbasary Arslan Dandybaevqa, aýyl sharýashylyǵy basqarmasyna aýdan ákimimen birlese otyryp, ozyq tehnologıalardy qoldaný arqyly aýyl sharýashylyǵy daqyldarynyń ónimdiligin arttyrý sharalaryn ázirleýdi jáne jemis-kókónis ónimderin qaıta óńdeý boıynsha óndiris oryndaryn ashýǵa ınvestorlardy tartý boıynsha jumysty jandandyrýdy, sonymen qatar, «Prıma Qus» fabrıkasyn ýaqtyly paıdalanýǵa berýdi qamtamasyz etýdi tapsyramyn, –dedi oblys ákimi Marat Sultanǵazıev.
Sondaı-aq, aımaq basshysy Avat, Aqtam, Ketmen, Qaljat, Qyrǵyz, Kishi Dıhan, Súmbe aýyldyq okrýgterindegi sý qoımalarynyń tehnıkalyq-ekonomıkalyq negizdemesin ázirleýdi jáne Suńqar jáne Tıirmen taýly ózenderinde sý qoımalaryn salý jobalaryn odan ári iske asyrý máselesin sapaly zerdeleýmen qatar, bordaqylaý alańdaryn, sút fermalaryn, jylyjaılar men kókónis qoımalaryn qurý boıynsha sharalar qabyldaýdy jiti nazarǵa alýdy tapsyrdy.
Aıta keteıik, aýdan qus, iri qara jáne usaq mal ósirý boıynsha 4-shi orynda, jylqy malyn ósirýde 6-shy orynda tur. Búginde bul mańda 25 myń tonna sút óndiriledi, aýdanda 850 basqa arnalǵan eki bordaqylaý alańy jáne 200 basqa arnalǵan bir ǵana sút-taýar fermasy jumys istep tur.
