ايماقتا قۋاتتىلىعى جىلىنا 30 مىڭ توننا قۇس ەتىن وندىرەتىن ءبىر عانا «OTAN Green Food» كاسىپورنى بار. ول وتكەن 2021 جىلى تولىق قۋاتتىلىعىنىڭ جارتىسىن، ياعني 13 مىڭ توننا ءونىم ءوندىرىپ، 2020 جىلمەن سالىستىرعاندا 7،5 ەسەگە ارتىق كورسەتكىشكە قول جەتكىزگەن بولاتىن. ناتيجەسىندە، اعىمداعى جىلدىڭ 8 ايىندا قۇس فابريكاسىنىڭ ءونىم كولەمى 15،7 مىڭ توننانى قۇراپ، وتكەن جىلدىڭ سايكەس كەزەڭىمەن سالىستىرعاندا 2 ەسەگە ارتىق بولدى.
الداعى ۋاقىتتا قۋاتتىلىعى جىلىنا 35 مىڭ توننا ءونىم جانە 33،5 ميللياردتان استام ينۆەستيسيا قۇيىلاتىن برويلەر ەتىن ءوسىرۋ، سويۋ جانە وڭدەۋ بويىنشا تولىق سيكلدى قامتيتىن «پريما قۇس» قۇس فابريكاسىنىڭ قۇرىلىسى جۇرگىزىلۋدە. كاسىپورىن ىسكە قوسىلعاندا 580 جۇمىس ورنى اشىلادى دەپ كۇتىلۋدە. بۇل ءوز كەزەگىندە 600-گە جۋىق اۋدان تۇرعىنىنىڭ جۇمىس ىستەۋىنە مۇمكىندىك بەرەدى. جوسپار بويىنشا جوبا اعىمداعى جىلدىڭ قاراشا ايىندا پايدالانۋعا بەرىلەدى دەپ كۇتىلۋدە.
– ءونىم وندىرگەندە ءوزىمىزدى عانا قامتاماسىز ەتىپ قويماي، ەكسپورتقا جەتكىزۋدى دە جۇزەگە اسىرا الامىز. وسىعان وراي، وبلىس اكىمىنىڭ ورىنباسارى ارسلان داندىبايەۆقا، اۋىل شارۋاشىلىعى باسقارماسىنا اۋدان اكىمىمەن بىرلەسە وتىرىپ، وزىق تەحنولوگيالاردى قولدانۋ ارقىلى اۋىل شارۋاشىلىعى داقىلدارىنىڭ ونىمدىلىگىن ارتتىرۋ شارالارىن ازىرلەۋدى جانە جەمىس-كوكونىس ونىمدەرىن قايتا وڭدەۋ بويىنشا ءوندىرىس ورىندارىن اشۋعا ينۆەستورلاردى تارتۋ بويىنشا جۇمىستى جانداندىرۋدى، سونىمەن قاتار، «پريما قۇس» فابريكاسىن ۋاقتىلى پايدالانۋعا بەرۋدى قامتاماسىز ەتۋدى تاپسىرامىن، –دەدى وبلىس اكىمى مارات سۇلتانعازييەۆ.
سونداي-اق، ايماق باسشىسى اۆات، اقتام، كەتمەن، قالجات، قىرعىز، كىشى ديحان، سۇمبە اۋىلدىق وكرۋگتەرىندەگى سۋ قويمالارىنىڭ تەحنيكالىق-ەكونوميكالىق نەگىزدەمەسىن ازىرلەۋدى جانە سۇڭقار جانە تيىرمەن تاۋلى وزەندەرىندە سۋ قويمالارىن سالۋ جوبالارىن ودان ءارى ىسكە اسىرۋ ماسەلەسىن ساپالى زەردەلەۋمەن قاتار، بورداقىلاۋ الاڭدارىن، ءسۇت فەرمالارىن، جىلىجايلار مەن كوكونىس قويمالارىن قۇرۋ بويىنشا شارالار قابىلداۋدى ءجىتى نازارعا الۋدى تاپسىردى.
ايتا كەتەيىك، اۋدان قۇس، ءىرى قارا جانە ۇساق مال ءوسىرۋ بويىنشا 4ء-شى ورىندا، جىلقى مالىن وسىرۋدە 6-شى ورىندا تۇر. بۇگىندە بۇل ماڭدا 25 مىڭ توننا ءسۇت وندىرىلەدى، اۋداندا 850 باسقا ارنالعان ەكى بورداقىلاۋ الاڭى جانە 200 باسقا ارنالعان ءبىر عانا ءسۇت-تاۋار فەرماسى جۇمىس ىستەپ تۇر.
