Qazaqstan Respýblikasy Syrtqy ister ministrligi Qara teńizdegi jaǵdai boiynsha málimdeme jasady, dep habarlaidy Dalanews.kz.
Vedomstvo 13 qańtarda Qara teńiz akvatoriiasynda Kaspii qubyry konsortsiýmynyń teńiz terminalyna bet alǵan úsh tankerge ushqyshsyz ushý apparattary arqyly jasalǵan shabýyldarǵa bailanysty alańdaýshylyq bildirdi.
"Birqatar eýropalyq memlekettiń elshilerimen ótkizilgen shuǵyl kezdesýler, sondai-aq, amerikalyq tarappen jáne ózge de sheteldik seriktestermen bolǵan bailanystar barysynda halyqaralyq quqyq normalaryn qatań saqtai otyryp, kómirsýtegin tasymaldaýdyń, onyń ishinde teńiz joldaryndaǵy qaýipsizdikti qamtamasyz etý boiynsha qajet sharalar qabyldaýdyń mańyzdylyǵyna erekshe mán berdik. Qazaqstan Respýblikasynyń qandai da bir qarýly qaqtyǵysqa qatysýshy emes", - dep jazylǵan habarlamada.
Ministrlik tankerlerdiń ruqsattary bolǵanyn jáne talap etiletin sáikestendirý jabdyqtarymen qamtamasyz etilgenin málimdedi.
"Keiingi ýaqytta mundai oqiǵalar jiileýi halyqaralyq energetikalyq infraqurylymnyń qalypty jumys isteýine tónetin táýekelderdiń artyp kele jatqanyn aiǵaqtaitynyn atap ótemiz jáne seriktesterimizdi aldaǵy ýaqytta osyndai oqiǵalardyń aldyn alý maqsatynda birlesken sharalar ázirleý úshin tyǵyz ózara is-qimyl jasaýǵa shaqyramyz", - dedi vedomstvo ókili.
Eske salaiyq, buǵan deiin "QazMunaiGaz" ulttyq kompaniiasy da Kaspii qubyr konsortsiýmy terminalyndaǵy oqiǵaǵa pikir bildirdi.
Sonymen qatar, Energetika ministrligi 13 qańtarda Qara teńiz akvatoriiasynda, KQK teńiz terminaly mańynda Qazaqstannyń eksporttyq munaiyn tasymaldaýǵa qatysqan eki kemede tirkelgen keleńsiz oqiǵalar týraly aqparatty resmi túrde rastady.
