QR Indýstrıa mınıstrligi 4 paıyzben biriletin avtonesıeniń birer kúnde bastalatynyn jarıa etti. Úkimet qaýlysy shyǵyp, endi tek «Jasyl damýdyń» bankterge aqsha aýdarǵanyn kútip otyr eken.
Qazaqstandyqtardyń jańa kólik alýy úshin 100 mıllıard teńge bólý josparlanǵan. Nesıe jeti jylǵa, 10 mıllıon teńgege deıin beriledi.
Biraq qaltańyzda qosymsha aqshańyz bolsa, 15 mıllıon teńgege deıingi kólik tańdaı alasyz. Alǵashqy jarna qajet emes. Negizgi talap – avtokólik Qazaqstanda qurastyrylýy tıis.
Shetel asyp kelgen nemese minilgen mashınany nesıege ala almaısyz. Tórt paıyzben kólik alǵan adam tek eki jyldan keıin ǵana baǵdarlamaǵa qaıta qatysa alady.
Jeńildetilgen avtonesıe elimizde 2015 jyldan bastap berlip keledi. Sonyń arqasynda 30 myń otandasymyz temir tulpar tizgindegen. Sol kezde kólikke qoly jetpegender baǵyn bul joly da synap kóre alady.
– Búkil álemde avtomobıl tapshylyǵy baıqalýda. Logıstıkalyq tizbek buzylǵan. Sondyqtan óndirýshiler únemi jumys júrgizip, seriktesterimen qajet bólshekterdi jetkizýge qatysty kelissóz ótkizip jatyr. Soǵan qaramastan bıyl shamamen 109 myń jeńil avtokólik qurastyrý josparymyzda bar. Bul 2020 jylǵy kórsetkishten 20 paıyzǵa joǵary, – deıdi QR Indýstrıa damý komıteti tóraǵasynyń orynbasary Oljas Saparbekov.
