ەلىمىزدە باستالعان جەڭىلدەتىلگەن اۆتونەسيە باعدارلاماسىنا كەز كەلگەن ازامات قاتىسا الادى. تەك تولەم قابىلەتىڭىز جەتسە بولدى، – دەپ حابارلايدى كتك ارناسى.

ق ر يندۋستريا مينيسترلىگى 4 پايىزبەن بىرىلەتىن اۆتونەسيەنىڭ بىرەر كۇندە باستالاتىنىن جاريا ەتتى. ۇكىمەت قاۋلىسى شىعىپ، ەندى تەك «جاسىل دامۋدىڭ» بانكتەرگە اقشا اۋدارعانىن كۇتىپ وتىر ەكەن.

قازاقستاندىقتاردىڭ جاڭا كولىك الۋى ءۇشىن 100 ميلليارد تەڭگە ءبولۋ جوسپارلانعان. نەسيە جەتى جىلعا، 10 ميلليون تەڭگەگە دەيىن بەرىلەدى.

ءبىراق قالتاڭىزدا قوسىمشا اقشاڭىز بولسا، 15 ميلليون تەڭگەگە دەيىنگى كولىك تاڭداي الاسىز. العاشقى جارنا قاجەت ەمەس. نەگىزگى تالاپ – اۆتوكولىك قازاقستاندا قۇراستىرىلۋى ءتيىس.

شەتەل اسىپ كەلگەن نەمەسە مىنىلگەن ماشينانى نەسيەگە الا المايسىز. ءتورت پايىزبەن كولىك العان ادام تەك ەكى جىلدان كەيىن عانا باعدارلاماعا قايتا قاتىسا الادى.    

جەڭىلدەتىلگەن اۆتونەسيە ەلىمىزدە 2015 جىلدان باستاپ بەرلىپ كەلەدى. سونىڭ ارقاسىندا 30 مىڭ وتانداسىمىز تەمىر تۇلپار تىزگىندەگەن. سول كەزدە كولىككە قولى جەتپەگەندەر باعىن بۇل جولى دا سىناپ كورە الادى.

– بۇكىل الەمدە اۆتوموبيل تاپشىلىعى بايقالۋدا. لوگيستيكالىق تىزبەك بۇزىلعان. سوندىقتان وندىرۋشىلەر ۇنەمى جۇمىس جۇرگىزىپ، سەرىكتەستەرىمەن قاجەت بولشەكتەردى جەتكىزۋگە قاتىستى كەلىسسوز وتكىزىپ جاتىر. سوعان قاراماستان بيىل شامامەن 109 مىڭ جەڭىل اۆتوكولىك قۇراستىرۋ جوسپارىمىزدا بار. بۇل 2020 جىلعى كورسەتكىشتەن 20 پايىزعا جوعارى، – دەيدى ق ر يندۋستريا دامۋ كوميتەتى ءتوراعاسىنىڭ ورىنباسارى ولجاس ساپاربەكوۆ.