Qańtar oqıǵasy kezinde azaptalǵanyn aıtqan qyrǵyz mýzykantyna qatysty is: 4 polıseı ustalǵan

Saǵynysh Sardarova 15 sáý. 2024 11:48 8392

Qańtar oqıǵasy kezinde ustalyp, keıin bosap shyqqan qyrǵyz mýzykanty Vıkram Rýzahýnov áleýmettik jelide osy oqıǵaǵa qatysty mán-jaıdy aıtty, - dep habarlaıdy Dalanews.kz.

Ol ózine qatysty is Qazaqstan Respýblıkasynyń Bas prokýratýrasyna joldanǵanyn málimdedi.

"Osy qurylymnyń eki qyzmetkeri bastalǵan isti sońyna deıin jetkizý úshin Astanadan Almatyǵa arnaıy issaparmen jiberildi.

Qazir buryn anyqtalǵan polısıa qyzmetkerleriniń tórteýi ustaldy jáne qamaýǵa alyndy (olardyń biri azaptaý men zorlyq-zombylyq deregin moıyndady, ekinshisi ótirik aqparattar jarıalaý úshin blogerler men jýrnalıserdi jaldady)", - dedi ol áleýmettik jelide.

Onyń sózinshe, qazir jábirlenýshiler qatary kóbeıgen.

"Adamdardyń sanasy birtindep oıanyp jatyr, jábirlenýshiler qatarynda qazir 22 adam bar. Olar - menimen birge quqyq qorǵaý organdarynyń qatygezdigi men qorlyǵyna ushyraǵandar, bir ýaqytta, bir jerde. ...Bas prokýratýra bul isti aıaqtaıtynyna sendirdi, al alǵashqy 4 qylmyskerdi ustaý - tek bastamasy.

Eshkim jaýapkershilikten qashyp qutylmaıdy! Azaptaý, zorlyq-zombylyqqa jol joq!!! ... Tergeý jalǵasyp jatyr", - dedi ol.

Buǵan deıin Almatydaǵy polısıada azaptalǵanyn málimdegen tanymal qyrǵyz mýzykanty Vıkram Rýzahýnov vıdeoúndeý jarıalady. Áleýmettik jelilerde taralǵan vıdeoda ol ádilet úshin kúresetinin aıtqan edi.

"Uzaq oılandym. Mýzyka men kásipke eshteńe bolmaǵandaı orala almaıtynymdy túsindim. TMD elderindegi demokratıany damytýǵa, adam quqyqtaryna qatysty jaǵdaıdy jaqsartýǵa úles qosqym keledi", – dedi ol.

Rýzahýnovqa qyrǵyz zańgerleri kómektesetini belgili boldy. 10 aqpanda ol Qazaqstandaǵy polısıa kúshteri ózin azaptaǵanyn aıtqan.

Rýzahýnovtyń málimdeýinshe, ol jeltoqsannyń aıaǵynda Almatyǵa kelip, 7 qańtarda eline qaıtyp bara jatqan ýaqytta ustalǵan. Onyń qujattaryn, bank kartalaryn, aqshasyn tartyp alǵan.

Úsh kún qamaýda bolǵan qyrǵyz mýzykanty sol jyly 10 qańtarda Qyrǵyzstanǵa qaıtaryldy. Bet-aýzy kógergen Rýzahýnov Bishkekke jetken bette aýrýhanaǵa tústi.

Qazaqstandaǵy qańtar oqıǵasy kezinde eki qyrǵyz azamaty qaza tapqan. Onǵa jýyq qyrǵyzstandyq qamaýdan bosatyldy.


Usynylǵan
Sońǵy jańalyqtar