Sýdia Roman Selitskii Hamit pen Bimýrzaevty "Azaptaý" babymen aiypty dep taýyp, úsh jylǵa sottady. Olar jazasyn qonys koloniiasynda óteýi tiis. Al Qalymbaidyń "qyzmetine salǵyrt qarady" degen aiyppen bir jarym jylǵa bas bostandyǵy shekteldi.
Sot úsheýin qyzmette alǵan shenderinen aiyryp, úsh jyl organda jumys isteýge tyiym saldy. Aiyptalýshylar sotta óz kinálaryn moiyndamady.
Úsh politseige úkim shyqqanyn sýdia Selitskiidiń hatshysy Aidana Aidildaeva rastady, biraq ol basqa aqparat berýge quqyǵym joq dep úkimge qatysty pikir aitpady.
Baqyt Hamittiń advokaty Marat Aidarbekov Azattyqqa "úkimmen kelispeitinderin, apelliatsiialyq shaǵym túsiretinderin" jetkizdi.
Advokattyń oiynsha, tergeý kezinde kóp zań buzylǵan, al tergeýge sebep bolǵan videojazba zańsyz jolmen alynǵan.
– Mundai videojazba tergeý sotynyń sanktsiiasymen ǵana alynýy kerek, sebebi oqiǵa kúzetiletin qupiia mekeme – politsiia bólimshesinde bolǵan. Biraq tergeý sotynyń sanktsiiasy bolmaǵan. Eger dáleldiń alyný joly zańsyz bolsa, sot ol videony qabyldamaýy kerek edi, – deidi advokat.
29 jastaǵy Timýr Radchenkony azaptaý isi qarasha sońynda qarala bastaǵan. Ol sotta "2022 jyly 8 qańtarda politseiler kólik aidap ketti degen kúdikpen ózin Bostandyq aýdany politsiia bólimshesine aparyp, soqqanyn" aitqan. Radchenko politseiler tórt kún bólimshede zańsyz ustaǵanyn da málimdegen.
10 qańtardaǵy otyrysta prokýror politseilerge tórt jyl túrme jazasyn suraǵan. Al Radchenko "Qalymbai men Bimýrzaev shyǵyndy ótegenge deiin keshirim surady" degen.
– Olar tórt jyl otyrǵanyn qalamaimyn, bul kóp. Olardy keshirdim, otbasylary bar, jumystan da shyǵarmasańyzdar. Al Baqyt Hamit keshirim de suraǵan joq, odan moraldyq shyǵyn retinde 300 myń teńge óndirýdi suraimyn. Keshirim suramady. Sýdia, ózińiz sheshersiz, – dedi Radchenko sotta.
Al sottaǵy sońǵy sózderinde Hamit, Qalymbai jáne Bimýrzaev aiyppen kelispegen. Biraq Bimýrzaev Radchenkoǵa qol kóterip jibergenin moiyndaǵan.
– Aiyppen kelispeimin. Timýr Radchenkomen tanys emespin. Qańtar oqiǵasy kezinde tórt kún demalyssyz jumys istedim. Radchenko til tigizgende salyp jibergenim ras. Ústindegi kiiminiń "kapiýshonyn" julyp alǵanym da ras. Azaptamadym. Úkim shyǵararda tórt balam baryn eskerseńiz, jábirlenýshiden de keshirim suradym, – dedi Bimýrzaev sotta.
Sot úkimi áli kúshine engen joq.
2022 jyly Qańtar oqiǵasy kezinde ustalǵan júzdegen adam qamaýda azaptalǵandaryn aitqan. Bas prokýratýra Qańtar qyrǵynynda qaza tapqan 238 adamnyń altaýy azaptaýdan kóz jumdy degen.
Bilik basynda azaptaý faktilerin joqqa shyǵaryp kelgen, keiin azaptaý faktilerin aitýshylar kóbeigen tusta bul aqparatty moiyndady.
Bas prokýror Berik Asylov 5 qańtarda parlamenttegi jiynda azaptaý shaǵymdary boiynsha 329 is qozǵalyp, prokýratýrada UQK men politsiianyń 34 qyzmetkeriniń isi qaralyp jatqanyn aitqan.
