Qandai kelisimge keldi?
Memleket basshylary Belarýske Ujymdyq qaýipsizdik shart uiymy Ujymdyq qaýipsizdik keńesiniń kezekti sessiiasyna qatysý úshin keldi.
Prezidentter ekijaqty qarym-qatynastardyń perspektivalaryn, onyń ishinde qazaq-qyrǵyz shekarasyndaǵy jaǵdaidy retteý máselesin talqylady.
Nazarbaev Jeenbekovti memleket basshysy qyzmetine sailanýymen quttyqtap, eki halyq arasyndaǵy baýyrlastyq, tatý kórshilik qarym-qatynasty “qaitarý qajet” ekenin atap ótti.
“Shekaradaǵy jaǵdai boiynsha mynadai sheshim qabyldandy. Bizdiń elderimizdiń úkimeti jasaǵan “jol kartasy” bar, búgin-erteń ony qaraý úshin jumys toptary kezdesip, ol “kartaǵa” qol qoiady. Sondai-aq “Qordai” baqylaý-ótkizý pýnktinde shekarany ýaqytsha ashýǵa jáne eki taraptan baqylaý ornatýǵa sheshim qabyldandy. Sonymen qatar, EAEO-dan úsh adam júkterdi qarap, ótkizip otyrady. Qytaimen shekarada da osyndai tekseris júrgiziledi”, — dep habarlady Qazaqstan basshysy.
Nazarbaev Jeenbekovti resmi saparmen Qazaqstanǵa shaqyrǵanyn aita ketti. Qyrǵyz basshysy áriptesine alǵys bildirdi.
“Biz Nursultan Ábishulymen barlyq máseleni talqylap, bir sheshimge keldik. “Jol kartasy” ázirlendi, jeltoqsanda bul baǵyttaǵy jumystardy aiaqtaimyz. Shekarada qazaq jáne qyrǵyz tarapynan da, EAEO tarapynan da baqylaý ornatamyz. Barlyq másele kelisilgen merzimde sheshiledi”, — dep atap ótti Jeenbekov.
Qazaqstan men Qyrǵyzstannyń qarym-qatynasy Qyrǵyzstandaǵy prezident sailaýy naýqany kezinde qazan aiynyń basynda shielenisken bolatyn. Almazbek Atambaev Qazaqstandy sailaýaldy naýqanǵa aralasty dep aiyptady.
