مەملەكەت باسشىلارى بەلارۋسكە ۇجىمدىق قاۋىپسىزدىك شارت ۇيىمى ۇجىمدىق قاۋىپسىزدىك كەڭەسىنىڭ كەزەكتى سەسسياسىنا قاتىسۋ ءۇشىن كەلدى.
پرەزيدەنتتەر ەكىجاقتى قارىم-قاتىناستاردىڭ پەرسپەكتيۆالارىن، ونىڭ ىشىندە قازاق-قىرعىز شەكاراسىنداعى جاعدايدى رەتتەۋ ماسەلەسىن تالقىلادى.
نازاربايەۆ جەەنبەكوۆتى مەملەكەت باسشىسى قىزمەتىنە سايلانۋىمەن قۇتتىقتاپ، ەكى حالىق اراسىنداعى باۋىرلاستىق، تاتۋ كورشىلىك قارىم-قاتىناستى “قايتارۋ قاجەت” ەكەنىن اتاپ ءوتتى.
“شەكاراداعى جاعداي بويىنشا مىناداي شەشىم قابىلداندى. ءبىزدىڭ ەلدەرىمىزدىڭ ۇكىمەتى جاساعان “جول كارتاسى” بار، بۇگىن-ەرتەڭ ونى قاراۋ ءۇشىن جۇمىس توپتارى كەزدەسىپ، ول “كارتاعا” قول قويادى. سونداي-اق “قورداي” باقىلاۋ-وتكىزۋ پۋنكتىندە شەكارانى ۋاقىتشا اشۋعا جانە ەكى تاراپتان باقىلاۋ ورناتۋعا شەشىم قابىلداندى. سونىمەن قاتار، ەاەو-دان ءۇش ادام جۇكتەردى قاراپ، وتكىزىپ وتىرادى. قىتايمەن شەكارادا دا وسىنداي تەكسەرىس جۇرگىزىلەدى”، — دەپ حابارلادى قازاقستان باسشىسى.
نازاربايەۆ جەەنبەكوۆتى رەسمي ساپارمەن قازاقستانعا شاقىرعانىن ايتا كەتتى. قىرعىز باسشىسى ارىپتەسىنە العىس ءبىلدىردى.
“ءبىز نۇرسۇلتان ابىشۇلىمەن بارلىق ماسەلەنى تالقىلاپ، ءبىر شەشىمگە كەلدىك. “جول كارتاسى” ازىرلەندى، جەلتوقساندا بۇل باعىتتاعى جۇمىستاردى اياقتايمىز. شەكارادا قازاق جانە قىرعىز تاراپىنان دا، ەاەو تاراپىنان دا باقىلاۋ ورناتامىز. بارلىق ماسەلە كەلىسىلگەن مەرزىمدە شەشىلەدى”، — دەپ اتاپ ءوتتى جەەنبەكوۆ.
قازاقستان مەن قىرعىزستاننىڭ قارىم-قاتىناسى قىرعىزستانداعى پرەزيدەنت سايلاۋى ناۋقانى كەزىندە قازان ايىنىڭ باسىندا شيەلەنىسكەن بولاتىن. المازبەك اتامبايەۆ قازاقستاندى سايلاۋالدى ناۋقانعا ارالاستى دەپ ايىپتادى.
