Pavlodar oblysynyń politsiiasy áleýmettik jelige Nastia Brovka esimimen tirkelgen azamattyń ústinen qylmystyq is qozǵady.
1 mamyr Birlik kúni taraǵan videoda Pavlodar turǵyny oblysqa qonystanyp jatqan qandastarǵa til tigizip, shovinistik pikir bildirgen. Sonymen qatar Pavlodar ataýyn aýystyrýǵa qarsy ekenin aityp, bylapyt sózderdi aralastyra sóilegen edi.
“1 mamyrda Instagram jelisindegi áleýmettik jelilerge monitoring júrgizý barysynda @nastya_brovkapvl paraqshasynda boijetken áleýmettik jelide balaǵat sózder aityp, Mońǵol Halyq Respýblikasynan kelgen kandastar týraly teris sózder aitqan video jariialaǵan.
Bul derek Pavlodar qalasy PP Soltústik politsiia bóliminde tirkeldi. Quqyq buzýshy anyqtaldy. Ol 27 jastaǵy pavlodarlyq áiel bolyp shyqty.
Onyń ústinen QR Qylmystyq kodeksiniń 174-baby (áleýmettik, ulttyq, rýlyq, násildik, taptyq nemese dini arazdyqty qozdyrý) boiynsha sotqa deiingi tergeý bastaldy.
Qajetti saraptama taǵaiyndaldy”, – dep málimdedi osy oraida Pavlodar oblysynyń politsiia departamentiniń (PB) bastyǵy Vasilii Skliar sársenbide.
Sonymen qatar, áleýmettik jelide ádepsiz sózder aitqany úshin ÁQBtK-niń 434-babynyń 1-bóligi boiynsha ákimshilik jaýapkershilikke tartylǵan.
“Material sotta qaralyp, quqyq buzýshyǵa 20 AEK (69 myń teńge) kóleminde ákimshilik aiyppul salyndy”, – dep alyp qosty Skliar.
https://dalanews.kz/bas-takyryp/88478-zhanga-qazaqstannyng-oz-ayes-i-boluy-kerek
https://dalanews.kz/kogam/88910-qaisar-askeri-patriottyq-oyyndarynyng-aq
