Oblys basshysy sapar barysynda Jarkent polipropilen jáne krahmal-sirne zaýyttarynyń múmkindikterimen tanysty. Eki kásiporyndy basqaryp otyrǵan Zakirjan Kýziev munda shyǵarylatyn ónim túrlerin kórsetip, birqatar máselelerdi sheshýge qoldaý jasaýdy surady. Atap aitqanda, kásiporyn irgesin keńeitýge jer bólý, elektr energiiasynyń úzilispen beriletin qiyndyǵyn sheshý, sol siiaqty ónimderin tiep-jóneltýdegi keibir qiyndyqtar jaily baiandady. Óz kezeginde oblys ákimi atalǵan máselelerdiń qarastyrylatynyn, barynsha qoldaý jasalatynyn aitty.
Munan soń Qanat Bozymbaev Jarkenttegi perzenthana ǵimaratyn, sol siiaqty Golovatskii aýylyndaǵy Mádeniet úiin aralap, jylý júieleri men ǵimarattardy jóndeý máselesine nazar aýdardy. Golovatskii aýylynda bos turǵan bir qabatty ǵimarat oblystyq politsiia departamentiniń balansyna berilip, munda ýchaskelik politsiia pýnkti ornalasatyny, al jekemenshik balabaqsha úshin kásipkerlerge bos turǵan úsh qabatty ǵimarat usynylatyny aityldy.
Osy kúni Qanat Bozymbaev óńirdegi aktivpen kezdesip, aýdandaǵy ózekti máselelerdi talqylady. Aýdannyń 11 aidaǵy damý kórsetkishterin baiandaǵan aýdan ákimi Talǵat Ómirálievtiń sózinen keiin oblys basshysy Qanat Bozymbaev Sholaqai aýylyndaǵy sýmen qamtý júiesin jańǵyrtý, Penjimjegi kóp páterli 2 úidiń jylý júiesiniń máselesin jyldam sheship, paidalanýǵa berý, ózin ózi jumyspen qamtyǵan azamattardy eńbekpen qamtý, Jarkent qalasyn abattandyrý sharalaryna erekshe kóńil bólý kerektigin eskertti. Shaǵyn jáne orta bizneste investitsiialyq jobalar daiyndaýdy, óńdeý kásiporyndaryn ashýdy tapsyrdy. Júgeri ósirýshilerge qoldaý kórsetiletinin, irrigatsiialyq júielerdi jańǵyrtý qolǵa alynatynyn jáne aýyl ishilik joldardy jóndeý jalǵasatynyn aitty.
– Oblys ákimi retinde árbir aýdannyń hal-jaǵdaiyn, máselelerin bilýim kerek. «Halyq únine qulaq asatyn memleket» tujyrymdamasy aiasynda «Tvitterdegi» jeke paraqshamda turǵyndarmen keri bailanys ornattym. Olar óz óńirlerindegi máselelerge qatysty usynystar men ótinishterin jazyp jatady. Týyndaǵan qandai máselelerdi bolsyn sheshýge elimizde barlyq múmkindik bar, – dedi Qanat Bozymbaev.
Sapar barysynda oblys basshysy Penjim aýylynyń aqsaqaldarymen kezdesip, otbasynda, mektepte jas urpaqty tárbieleý máselesin talqylady. Olar balalarǵa jastaiynan Otanǵa degen súiispenshilikti sińirý, qundylyqtarǵa degen kózqarastaryn qalyptastyrý, birlik, ózara túsinistik pen syilastyq týraly áńgime qozǵady. Qanat Bozymbaev ultaralyq tatýlyq Panfilov aýdanynyń basty basymdyǵy bolýy tiistigin eske saldy. Sondai-aq barlyq mektepterde balalarmen quqyqtyq tártip turǵysynan jumys isteitin shtat ashyp, oǵan iývenaldy politsiianyń zeinetkerlikke shyqqan burynǵy qyzmetkerlerin tartýdy usyndy. Penjim aýylyn kórkeitý, infraqurylymyn damytý máselelerine qatysty naqty tapsyrmalar berdi.
Budan soń Qanat Bozymbaev «Qorǵas – Shyǵys qaqpasy» AEA-ny, «Qorǵas» HShYO-ny, Qurǵaq portty, «Nur joly» ótkizý pýnktin, «Altynkól» stansysyn damytý jumystarymen tanysyp, jaýapty tulǵalarǵa júk kólikteriniń uzyn-sonar kezegin boldyrmaý máselesi týraly arnaiy jiyn ótkizýdi tapsyrdy.
– Sizdermen alǵash ret kezdesip, arnaiy ekonomikalyq aimaqtyń damý múmkindikterimen tanysyp otyrmyn. Aldaǵy ýaqytta arnaiy jiyn ótkizip, jumysty qalai jaqsartý kerektigin birlesip keńinen talqylaimyz. Almaty oblysynyń logistikalyq múmkindikterin ekonomikanyń negizgi baǵyty retinde damytyp, jumys oryndaryn ashatyn bolamyz, – dedi Qanat Bozymbaev.
