وبلىس باسشىسى ساپار بارىسىندا جاركەنت پوليپروپيلەن جانە كراحمال-سىرنە زاۋىتتارىنىڭ مۇمكىندىكتەرىمەن تانىستى. ەكى كاسىپورىندى باسقارىپ وتىرعان زاكيرجان كۋزييەۆ مۇندا شىعارىلاتىن ءونىم تۇرلەرىن كورسەتىپ، ءبىرقاتار ماسەلەلەردى شەشۋگە قولداۋ جاساۋدى سۇرادى. اتاپ ايتقاندا، كاسىپورىن ىرگەسىن كەڭەيتۋگە جەر ءبولۋ، ەلەكتر ەنەرگياسىنىڭ ۇزىلىسپەن بەرىلەتىن قيىندىعىن شەشۋ، سول سياقتى ونىمدەرىن تيەپ-جونەلتۋدەگى كەيبىر قيىندىقتار جايلى باياندادى. ءوز كەزەگىندە وبلىس اكىمى اتالعان ماسەلەلەردىڭ قاراستىرىلاتىنىن، بارىنشا قولداۋ جاسالاتىنىن ايتتى.
مۇنان سوڭ قانات بوزىمبايەۆ جاركەنتتەگى پەرزەنتحانا عيماراتىن، سول سياقتى گولوۆاسكيي اۋىلىنداعى مادەنيەت ءۇيىن ارالاپ، جىلۋ جۇيەلەرى مەن عيماراتتاردى جوندەۋ ماسەلەسىنە نازار اۋداردى. گولوۆاسكيي اۋىلىندا بوس تۇرعان ءبىر قاباتتى عيمارات وبلىستىق پوليسيا دەپارتامەنتىنىڭ بالانسىنا بەرىلىپ، مۇندا ۋچاسكەلىك پوليسيا پۋنكتى ورنالاساتىنى، ال جەكەمەنشىك بالاباقشا ءۇشىن كاسىپكەرلەرگە بوس تۇرعان ءۇش قاباتتى عيمارات ۇسىنىلاتىنى ايتىلدى.
وسى كۇنى قانات بوزىمبايەۆ وڭىردەگى اكتيۆپەن كەزدەسىپ، اۋدانداعى وزەكتى ماسەلەلەردى تالقىلادى. اۋداننىڭ 11 ايداعى دامۋ كورسەتكىشتەرىن بايانداعان اۋدان اكىمى تالعات ومىرالييەۆتىڭ سوزىنەن كەيىن وبلىس باسشىسى قانات بوزىمبايەۆ شولاقاي اۋىلىنداعى سۋمەن قامتۋ جۇيەسىن جاڭعىرتۋ، پەنجىمجەگى كوپ پاتەرلى 2 ءۇيدىڭ جىلۋ جۇيەسىنىڭ ماسەلەسىن جىلدام شەشىپ، پايدالانۋعا بەرۋ، ءوزىن ءوزى جۇمىسپەن قامتىعان ازاماتتاردى ەڭبەكپەن قامتۋ، جاركەنت قالاسىن اباتتاندىرۋ شارالارىنا ەرەكشە كوڭىل ءبولۋ كەرەكتىگىن ەسكەرتتى. شاعىن جانە ورتا بيزنەستە ينۆەستيسيالىق جوبالار دايىنداۋدى، وڭدەۋ كاسىپورىندارىن اشۋدى تاپسىردى. جۇگەرى وسىرۋشىلەرگە قولداۋ كورسەتىلەتىنىن، يرريگاسيالىق جۇيەلەردى جاڭعىرتۋ قولعا الىناتىنىن جانە اۋىل ىشىلىك جولداردى جوندەۋ جالعاساتىنىن ايتتى.
– وبلىس اكىمى رەتىندە ءاربىر اۋداننىڭ حال-جاعدايىن، ماسەلەلەرىن ءبىلۋىم كەرەك. «حالىق ۇنىنە قۇلاق اساتىن مەملەكەت» تۇجىرىمداماسى اياسىندا «تۆيتتەردەگى» جەكە پاراقشامدا تۇرعىندارمەن كەرى بايلانىس ورناتتىم. ولار ءوز وڭىرلەرىندەگى ماسەلەلەرگە قاتىستى ۇسىنىستار مەن وتىنىشتەرىن جازىپ جاتادى. تۋىنداعان قانداي ماسەلەلەردى بولسىن شەشۋگە ەلىمىزدە بارلىق مۇمكىندىك بار، – دەدى قانات بوزىمبايەۆ.
ساپار بارىسىندا وبلىس باسشىسى پەنجىم اۋىلىنىڭ اقساقالدارىمەن كەزدەسىپ، وتباسىندا، مەكتەپتە جاس ۇرپاقتى تاربيەلەۋ ماسەلەسىن تالقىلادى. ولار بالالارعا جاستايىنان وتانعا دەگەن سۇيىسپەنشىلىكتى ءسىڭىرۋ، قۇندىلىقتارعا دەگەن كوزقاراستارىن قالىپتاستىرۋ، بىرلىك، ءوزارا تۇسىنىستىك پەن سىيلاستىق تۋرالى اڭگىمە قوزعادى. قانات بوزىمبايەۆ ۇلتارالىق تاتۋلىق پانفيلوۆ اۋدانىنىڭ باستى باسىمدىعى بولۋى تيىستىگىن ەسكە سالدى. سونداي-اق بارلىق مەكتەپتەردە بالالارمەن قۇقىقتىق ءتارتىپ تۇرعىسىنان جۇمىس ىستەيتىن شتات اشىپ، وعان يۋۆەنالدى پوليسيانىڭ زەينەتكەرلىككە شىققان بۇرىنعى قىزمەتكەرلەرىن تارتۋدى ۇسىندى. پەنجىم اۋىلىن كوركەيتۋ، ينفراقۇرىلىمىن دامىتۋ ماسەلەلەرىنە قاتىستى ناقتى تاپسىرمالار بەردى.
بۇدان سوڭ قانات بوزىمبايەۆ «قورعاس – شىعىس قاقپاسى» اەا-نى، «قورعاس» حشىو-نى، قۇرعاق پورتتى، «نۇر جولى» وتكىزۋ پۋنكتىن، «التىنكول» ستانسىسىن دامىتۋ جۇمىستارىمەن تانىسىپ، جاۋاپتى تۇلعالارعا جۇك كولىكتەرىنىڭ ۇزىن-سونار كەزەگىن بولدىرماۋ ماسەلەسى تۋرالى ارنايى جيىن وتكىزۋدى تاپسىردى.
– سىزدەرمەن العاش رەت كەزدەسىپ، ارنايى ەكونوميكالىق ايماقتىڭ دامۋ مۇمكىندىكتەرىمەن تانىسىپ وتىرمىن. الداعى ۋاقىتتا ارنايى جيىن وتكىزىپ، جۇمىستى قالاي جاقسارتۋ كەرەكتىگىن بىرلەسىپ كەڭىنەن تالقىلايمىز. الماتى وبلىسىنىڭ لوگيستيكالىق مۇمكىندىكتەرىن ەكونوميكانىڭ نەگىزگى باعىتى رەتىندە دامىتىپ، جۇمىس ورىندارىن اشاتىن بولامىز، – دەدى قانات بوزىمبايەۆ.
