Narazy top qoǵam belsendisiniń qazasyn tergeý jumystary burmalanbaýyn jáne ministr Erlan Turǵymbaevtyń otstavkaǵa ketýin talap etti
"Mundai masqaradan keiin Turǵymbaev óz qyzmetinde bir sátke de otyrýǵa tiis emes", – deidi belsendi Bibigúl Tuiaqqyzy.
Budan soń Aǵadildiń jaqtastary IIM ǵimaratyna aparatyn joldy jaýyp tastaýǵa talpyndy. Alaida oqiǵa ornyna birneshe avtobýspen jetken bir top politsei jaǵdaidy dereý baqylaýǵa alyp, álgi jerde 30 shaqty azamatty quryqtady.
Abaqtyda kóz jumǵan 42 jasar Dýlat Aǵadil saiasi qýǵyn-súrginge ushyraǵandardy bosatý, elde demokratiia ornatý men adam quqyǵynyń saqtalýyn talap etken belsendi retinde belgili. Ol buǵan deiin birneshe ret narazylyq aktsiialaryna shyǵyp, qamaýda bolǵan.
Buǵan deiin áleýmettik jelide taraǵan videoda qoǵam belsendisi politseilerdiń ózine qysym jasaǵanyn aitqan.
"Quqyq qyzmetkerleri eki jyldan beri meni kóshede, ia kólikte ketip bara jatqan jerimnen esh negizsiz ustap áketýdi ádetke ainaldyrdy. Jurttyń kókeiindegi máseleni aitqany úshin belsendilerdi qýdalaýǵa salyp, zańsyzdyqtarǵa jol berip otyrǵan Tselinograd aýdany politsiia, sot jáne prokýratýra organy basshylaryn jaýapqa tartýdy talap etemin" – degen edi Aǵadil.
Áleýmettik jelide taraǵan taǵy bir videoda Aǵadil Qazaqstan prezidenti Toqaevqa, burynǵy prezident Nazarbaevqa jáne Bas prokýrorǵa úndeý jasaǵan.
"Halyqqa qarasyńyzdar, halyqpen oinamańyzdar. Taǵy da aitamyn, elim, jerim degen adamdardy qýdalaýdy, repressiiany toqtatyńyzdar!" degen Aǵadil qazirgi kezde Qazaqstanda qamaýda otyrǵan, quqyq qorǵaýshylar saiasi tutqyn dep tanyǵan Aron Atabek, Maks Boqaev, Serik Jahin, Almat Jumaǵulov, Muhtar Jákishev, Qaiyrly Omar syndy azamattardy bostandyqqa shyǵarýdy talap etken bolatyn.
Byltyrǵy jyldyń qarasha aiynda Dýlat Aǵadildiń ýaqytsha qamaý izoliatorynan qashyp shyqqany habarlandy. Belsendiniń ózi muny: "jazyqsyz qýdalaý men zańsyzdyq qashýǵa májbúr qyldy" dep túsindirgen.
Eske salaiyq, buǵan deiin Nur-Sultanda tergeý izoliatorynda qoǵam belsendisi Dýlat Aǵadil qaitys bolǵany habarlanǵan. Sot saraptamasy qorytyndysy onyń ustalǵan kezde mas kúide bolǵanyn kórsetti.
Politseilerdiń málimetinshe, óilmniń aldyn ala sebebi – júrek-qan tamyr jetkiliksizdigi. Denesinde eshqandai jaraqat bolmaǵan. Sotqa deiingi tergeý bastaldy.
Aǵadildiń advokaty politsiia quryqtaǵan kezde marqum mas kúide bolǵanyna senbeidi.
"Onyń ustalǵan kezindegi videosy bar, sap-saý. Meniń marqumnyń qorǵaýshysy retinde mindetim - tergeý amaldarynyń obektivti júrýin qadaǵalap, onyń burmalaýyna jol bermeý. Bul shynaiy ári ádiletti tergeý bolýy tiis", – deidi Baýyrjan Azanov.
https://youtu.be/YQlorD_mIiU
