Qaǵaz qaldyqtaryn óńdeitin zaýyt jumysy jandanyp keledi
Ońtústik Qazaqstan oblysyndaǵy «Býmprom» JShS qaǵaz qaldyqtarynan karton shyǵarý isin jandandyryp keledi. 2016 jyly jyly iske qosylǵan jobalardyń biri «Ońtústik» indýstriialdy aimaǵynda ornalasqan. Jobanyń jalpy quny 200 mln teńgeni quraidy. Kásiporyn jylyna 4 myń, al aiyna 350 tonna ónim shyǵarýǵa qaýqarly. Búginde munda 30 adam jumyspen qamtylǵan.
Kásiporyn basshysynyń orynbasary Serik Tashnazarovtyń aitýynsha, zaýytqa qajetti shikizat Qyzylorda, Almaty, Shymkent qalalarynan tasymaldanady. Búginde zaýyt basshylyǵy óndiriske qajetti qaǵaz qaldyqtarynyń bir kelisin 40 teńgeden satyp alyp otyr.
– Zaýyt toqtaýsyz jumys isteýi úshin qaǵaz qaldyqtary iaǵni makalatýra qajet. Qazirgi tańda shikizattyń baǵasy kúnnen kúnge ósip jatyr. Óitkeni bizdiń naryqtaǵy qaǵaz qaldyqtaryn ózbekstandyq kásipkerler satyp alý ústinde. Olar búginde makalatýranyń bir kelisiniń baǵasyn 60 teńgege deiin kóterip jiberdi. Sondyqtan «Atameken» kásipkerlik palatasyna shikizattyń osy túrin shetelge shyǵarýǵa shekteý qoisa degen usynysymyzdy joldadyq, – deidi Serik Tashnazarov.
Zaýytta toqtaýsyz jumys istep turǵan qondyrǵy Qytaidan arnaiy ákelinipti. Qaǵaz qaldyqtaryn jibitip, qaita karton etetin qurylǵyda jergilikti azamattar jumys isteidi. Qytailyq mamandardyń arnaiy oqytýynan ótken olar qondyrǵyny tolyq meńgergen.
Qazirgi tańda zaýyt ónimderine suranys mol. Ásirese, tapsyrystar Pavlodar, Qaraǵandy, Almaty oblystarynan jii túsedi. Aldaǵy ýaqytta kásiporyn basshylyǵy óz ónimderin kórshiles Ózbekstan, Qyrǵyzstan memleketterine jóneltýdi josparlap otyr.
OQO ákiminiń baspasóz qyzmeti
