Tanymal jýrnalist Erbolat Muhamedjan sý tasqynyna kómektesemin dep júrgen biraz adamdy synǵa aldy, - dep habarlaidy Dalanews.kz.
"Bizdiń keibir ánshi, ártis, qoǵam qairatkerleri, blogerler, depýtattar, ministrler sý tasqyny oryn alǵan óńirlerge baryp jatyr. Barsyn árine, barmasyn demeimiz.
Biraq syrttai qaraǵanda kontent jasaýmen ainalysyp jatqandai kórinedi. Ánshi, ártis, qoǵam qairatkerleri, blogerler eldi sabyrǵa shaqyryp, úndemei-aq kómekteskenniń ornyna, halyqty shýlatyp baibalamǵa salyp jatqandai áser qaldyrady", - dedi ol.
Jýrnalist depýtattar men ministrler de piardyń qamyn kúittegenin aitty.
"Al keibir depýtattar men ministrler taza piar úshin jasap júrgendei kórinedi. Qastarynda bir-bir mobilograf barlyǵynyń. Kádimgi kúshti mýzyka salyp, klip siiaqty túsirgen. Ótirik kúrek ustap, kameraǵa jaqsylap oinap podpischikterden laik jinaý úshin barǵan siiaqty", - dep jazdy ol.
Onyń sózinshe, sol óńirlerdegi azamattar osylaisha ózderiniń jumystaryna kedergi jasap jatqanyn jetkizipti.
"Halyqty tasýǵa arnalǵan vertoletterdi keibir kezde surap mazalaryn alǵan, Astanaǵa zvondaǵan. Bul qarapaiym jergilikti ákimdiktegiler úshin artyq jumys týdyrady. Sosyn olardy tasý kerek, kútý kerek, jaǵdaiyn jasaý kerek, kóńil bólýi kerek. Eger osylardy istemese barǵan jeri týraly nashar áńgime shyǵarady. Meniń oiymsha, tótenshe jaǵdai jariialanǵan óńirlerge dúrbeleń týdyratyndardyń barýyn shekteý kerek.
...Barǵan soń, shynaiy túrde kómegimizdi aiamaiyq. Biraq, “aidaǵanyń bes eshki, ysqyryǵyń jer jarady” maqalyna sáikes bolmaiyq…" - deidi jýrnalist.
Aita keteiik, buǵan deiin Májilis depýtaty Nartai Cársenǵaliev arnasynan adasyp aqqan sýdyń saldarynan ómir boiy jiǵan-tergen dúniesinen, úiinen, mal-múlkinen, qara shańyraǵynan qapyda airylǵan aǵaiynnyń ótinishin aitty. Onyń sózinshe, eldiń jartysy qarǵyn sý qaqpanynda otyr.
"Qazaq "Alpys kún tasyǵan sý, Alty kúnde qaitar" deidi. Biraq qaitqan sý ákelgen qaiǵysyn áketpeidi. ...Jumysyna salǵyrt qaraǵan memlekettik qyzmetkerlerdiń eshqaisysynyń laýazymyna, tegine qaramastan jazaǵa tartý kerek. Bul - Prezidenttiń jáne eldiń naqty talaby", - dedi ol.
Depýtat apta aiaǵynda qarǵyn sýdan qatty zardap shekken Atyraý oblysyndaǵy Qulsary qalasy men Batys Qazaqstan oblysyna aiaqtai barǵan. Qulsaryda 2900 úi sý astynda qalǵan. Ol Batys Qazaqstan oblysyndaǵy ahýal da kóńil kónshitpei otyrǵanyn, qazirdiń ózinde 1226 úidi, 1905 saiajaidy sý basyp qalǵanyn, 450 úi qiraǵanyn málimdedi.
"Endigi qater Jaiyq ózeninen. Jaiyqtyń kórshi eldegi eń joǵarǵy deńgeii 11,87 metr boldy, endi sol sý bizdiń elge qarai jóńkilep keledi. Jaiyq ózeni BQO-ń 600 shaqyrym jerine aǵyp ótedi, ondaǵy arnanyń eń biik núktesi - 8,5 metr. Demek kele jatqan sý qalyptaǵydan 3 metrden asa. Jaiyqtyń boiynda 84 eldi meken bar, ol jaqta 126 000 adam turady degen derek aldyq. El eleńdep otyr, úrei de joq emes", - dedi ol.
Nartai Aralbaiuly sý basqan óńirlerdegi basty máseleniń biri ótemaqy ekenin, sonymen qatar, komissiialar sý ketkenin kútpei qazirden bastap úilerge júzip baryp, aralyq akt jasaýy qajet ekenin jetkizdi.
