Resei prezidenti Vladimir Pýtin Reseiden tys jerde júrip, zań talaptaryn oryndaýdan jaltarǵan azamattarǵa qatysty ýaqytsha shekteý sharalaryn engizýdi kózdeitin zańǵa qol qoidy, dep habarlaidy dalanews.kz.
Jańa zańǵa sáikes, Resei úkimeti birqatar ákimshilik quqyqbuzýshylyqtar boiynsha jaýapkershilikke tartylǵan sheteldegi reseilikterge (relokanttarǵa) túrli shekteýler qoia alady.
Atap aitqanda, olardyń bank shottary men múlki buǵattalýy nemese ýaqytsha toqtatylýy múmkin. Sondai-aq Resei bankteriniń saittary men mobildi qosymshalaryna qoljetimdiligi shekteledi, nesie rásimdeýge tyiym salynady, elektrondy qoltańbany paidalaný quqyǵy toqtatylady, memlekettik onlain-qyzmetter men konsýldyq qyzmetterdi paidalaný múmkindigi shekteledi.
Budan bólek, mundai azamattarǵa jeke kásipker retinde tirkelýge jáne óz atynan mámileler jasaýǵa da tyiym salynýy yqtimal.
Zańdaǵy shekteýler, ásirese, Resei armiiasyn «diskreditatsiialaý», «shetel agentteri» týraly zańnamany buzý jáne «qajetsiz uiymdardyń» qyzmetine qatysý baptary boiynsha jaýapkershilikke tartylǵan azamattarǵa qatysty qoldanylady.
Atalǵan shekteýlerdi engizý jáne quqyq buzýshylardyń arnaiy tizilimin júrgizý quqyǵy Reseidiń Ádilet ministrligine beriledi.
