Almatyda Ál-Farabi atyndaǵy Qazaq ulttyq ýniversitetiniń 76 jastaǵy professory Káken Qamzin internet alaiaqtardyń qurbany boldy. Qazir bul oqiǵa boiynsha politsiia tergeý júrgizip jatyr,- dep habarlaidy Dalanews.kz.
Áleýmettik jelide taraǵan derekterge sáikes, ózin arnaiy qyzmet ókilderi retinde tanystyrǵan belgisiz bireýler professorǵa habarlasqan. Olar Káken Qamzinge páterin alaiaqtar tartyp alýy múmkin ekenin aityp, jyljymaityn múlikti satyp, aqshany qaýipsiz bank shotyna salýǵa "keńes" bergen.
Professor alaiaqtardyń sózine senip, páterin satyp, qarajatty kýrer arqyly sol adamdarǵa bergen.
Keibir jeli qoldanýshylarynyń jazýyna qaraǵanda, qazir páterdiń jańa ieleri Káken Qamzinnen úidi bosatýdy talap etip otyr. Al professordyń stýdentteri men belsendi azamattar onyń baspanasyn qaitarýǵa kómektesý úshin qarajat jinaýǵa kirisken.
Mán-jaidy Aibar Oljai da áleýmettik jelide egjei-tegjeili túsindirgen edi.
"Kinodaǵydai áreket etken. Aldymen Energosbyt adamdary retinde habarlasyp, meken-jaiy, JSN, páteri týraly aqparatty bilip alǵan. Artynan Ulttyq qaýipsizdik komitetiniń atyn jamylyp habarlasyp, bireýlerdiń úiin tartyp alaiyn dep turǵanyn aityp, tez úiin satýǵa kóndirgen", – deidi jýrnalist.
Ortalyq kommýnikatsiialar qyzmetindegi brifingte IIM Kiberqylmysqa qarsy kúres departamentiniń bastyǵy Jandos Súiinbai bul derekke qatysty tergeý júrip jatqanyn aitty. Almaty qalasy Áýezov aýdandyq politsiia basqarmasy qylmystyq is qozǵaǵan.
"Tergeý múddesine bailanysty egjei-tegjeili aqparat jariia etilmeidi. Qazir kúdiktilerdi anyqtaýǵa baǵyttalǵan jedel izdestirý sharalary júrgizilip jatyr", – dedi ol.
Jýrnalister professor baspanasyz qalýy múmkin be dep suraǵanda, Jandos Súiinbai:
"Menińshe, ol úisiz qalmaidy. Bul jyljymaityn múlik onyki. Alaiaqtyq áreketterge quqyqtyq turǵydan baǵa beriledi", – dep jaýap berdi.
Sondai-aq, IIM ókili páterdi satyp alǵan tulǵalardyń da iske qatysy tekserilip jatqanyn jetkizdi.
Jýrnalister ishki ister ministri Erjan Sádenovten osy isti jeke baqylaýyna alýyn surap otyr.
Káken Qamzin 1949 jyly 13 maýsymda burynǵy Taldyqorǵan oblysynyń Alakól aýdanyndaǵy Qarlyǵash aýylynda týǵan. Qazirgi tańda ózi bilim alǵan oqý ornynda - Jýrnalistika fakýltetiniń "Baspa isi jáne elektron BAQ" kafedrasynda dotsent.
