Prezidentke Qazaqstannyń BRIKS qurylymyna kirý múmkindigin qarastyrý týraly usynystar tústi. Bul týraly Prezidenttiń keńesshisi - Prezidenttiń Baspasóz hatshysy Berik Ýáli Tengrinews.kz saityna bergen suhbatynda aitty, - dep habarlaidy Dalanews.kz.
Memleket basshysy bul usynysty Qazaqstannyń ulttyq múddesi turǵysynan muqiiat qarastyrýda.
- Jýyrda (23-24 qazan kúnderi) Qazan qalasynda BRIKS sammiti ótedi. Bizge belgili bolǵandai, atalǵan qurylymǵa tóraǵalyq etip otyrǵan Resei Prezidenti Vladimir Pýtin Qasym-Jomart Toqaevty forýmǵa qonaq retinde shaqyrǵan.
- Prezidenttiń jumys kestesinde onyń BRIKS sammitine qatysýy qarastyrylǵany ras. Memleket basshysy 24 qazan kúni qurylymnyń "aýtrich" formatyndaǵy keńeitilgen quramda ótetin jiynynda sóz sóileidi.
– Ázerbaijan men Belarýs BRIKS quramyna kirý úshin ótinim berip qoidy. Sonymen qatar TMD-nyń ózge elderi de ynta bildirgen bolýy múmkin. Qazaqstannyń BRIKS-ke qatysty ustanymy qandai? Bizdiń elimiz atalǵan halyqaralyq qurylymǵa múshe bolýdy josparlap otyrǵan joq pa?
- Qazaqstan BRIKS-tiń damý evoliýtsiiasyn qyzyǵýshylyqpen muqiiat baqylap otyr. Bizdiń elimiz osy qurylymnyń negizin qalaǵan memleket basshylarynyń qandai da bir alpaýyt derjavanyń gegemoniiasynan azat, ádiletti ári demokratiialyq álemdik tártip qurý týraly bastamasyn qoldaidy.
Prezidentke Qazaqstannyń BRIKS qurylymyna kirý múmkindigin qarastyrý týraly usynystar tústi. Halyqaralyq qaýymdastyqtyń jaýapty jáne bedeldi múshesi retinde bizdiń elimizge mundai usynystyń túsýi qalypty dúnie.
Bul usynysty Memleket basshysynyń ózi muqiiat qarastyryp otyr jáne onyń tapsyrmasy boiynsha tiisti vedomstvolar Qazaqstannyń ulttyq múddeleri turǵysynan taldaý júrgizip jatyr.
Elimiz qurylymǵa múshe bolýǵa jáne osy birlestiktiń damý perspektivalaryna qatysty basqa da máselelerdi qaraýdyń kóp satyly protsesin eskere otyryp, qazir jáne jaqyn bolashaqta BRIKS-ke múshe bolýǵa ótinish berýden qalys qalady.
- Mundai jaǵdaida qazaq diplomatiiasy qai uiymǵa basymdyq bermek?
- Prezident buǵan deiin birneshe ret BUU-ny álemdegi ámbebap ári balamasy joq uiym retinde ataǵan bolatyn. Sondai-aq osy Uiymda barlyq ózekti halyqaralyq problemalardy, sonyń ishinde ádiletti álemdik tártip qurýǵa qatysty máselelerdi talqylaý kerek degen ustanymyn bildirgeni jurtshylyqqa málim.
- Alaida BUU qaýqarsyz uiymǵa ainaldy degen pikir de joq emes qoi...
- Prezidenttiń pikirinshe, BUU da kemshiliksiz emes. Biraq dál sondai basqa uiym joq. Sondyqtan BUU-ǵa álemdik qaýymdastyqtyń qoldaýy aýadai qajet.
BUU Jarǵysy halyqaralyq quqyqtyń negizi bolýy kerek jáne bul irgeli qujatta bekitilgen qaǵidalardy buzýǵa eshkimniń qaqysy joq.
Prezident BUU Qaýipsizdik Keńesiniń mańyzdy ári taǵdyrsheshti sheshim qabyldaý isinde dármensizdik tanytyp otyrǵanyna ókinish bildirgen bolatyn. Sondyqtan Memleket basshysy "orta derjavalardyń" múddelerin eskere otyryp, BUU-ǵa múshe memleketterdiń keń aýqymdy konsýltatsiialary negizinde BUU Qaýipsizdik Keńesin reformalaýdy bastaý qajet dep esepteidi.
