– Memleket basshysynyń Túrkistanǵa erekshe mártebe berý tapsyrmasyna bailanysty jumystar bastalyp ketti. Bul jumystar oblys ákimi Darhan Amangeldiulynyń tikelei baqylaýynda. Arnaiy jumysshy top qurylyp, onyń quramyna ózderińiz enip otyrsyzdar.
Memlekettik organ ókilderi jumysty úilestirgenimen, biz bul asa mańyzdy bastamany júzege asyrarda árbir usynysty nazarda ustaýymyz kerek.
Óitkeni ár salanyń óz mamandary, zertteýshileri bar. Túrkistanǵa erekshe mártebe berý bastamasy – tarihi shahar úshin óte mańyzdy. Al ol qalai júzege asýy kerek? Mán-maǵynasy, negizgi ideologiialyq jáne ekonomikalyq baǵyttary qandai bolady? Bul ábden ekshelip, arnaiy qujattar arqyly resimdelýi tiis.
Al ol úshin tarihshylar, arheologtar, rýhaniiat salasynyń ókilderi, týrizm salasynyń bilgirleri, zańgerler, iassaýitanýshylar, sáýletshi-arhitektorlar men jalpy Túrkistan janashyrlarynyń, ǵalymdar men zertteýshilerdiń pikiri óte mańyzdy.
Sondyqtan osy bastamaǵa qatysty óz oiyn aityp, úlesin qosamyn deitin qairatkerlerdiń usynystary jinaqtalyp, alynǵany jón. Osy jumysqa bar yntalaryńyzben atsalysýlaryńyz kerek, – dedi Beisen Dáýletuly.
Kún tártibinde Túrkistan qalasyna erekshe mártebe berý baǵytyndaǵy hattamalyq tapsyrmalardyń oryndalý barysy talqylandy. Mádeniet jáne Túrkistan oblystyq týrizm basqarmasy ókilderiniń usynystary tyńdaldy. Túrkistan qalasy ákimdigi tarapynan bastalǵan jumystar da baiandaldy.
Jumysshy top quramyna engen basqarma basshylary men ókilderiniń, sáýletshilerdiń de pikirleri aityldy. Qoja Ahmet Iasaýi kesenesin qorǵaý, «Túrkistan qalasyna erekshe mártebe berý» zańnamasyna usynystar jinaqtaý jónindegi bastapqy qadamdar da saralandy. Jumysshy top jinaqtalǵan usynystar júielenip, sol boiynsha jumys júrgiziledi.
