Qazaqstan prezidenti Qasym-Jomart Toqaev birqatar óńirinde bolǵan sý tasqyny saldarynan týyndaǵan tótenshe jaǵdaiǵa bailanysty shuǵyl keńes ótkizdi. Bul shara barysynda memleket basshysy qalyptasqan jaǵdaiǵa bailanysty keshirim surap, barlyq azamatqa kómek kórsetiletinin aitty. Qoǵam qairatkeri Qairat Dáýitqulov prezidenttiń mundai áreketin qoldaitynyn aitady.
«Qazirgi sátte elimizde bolyp otyrǵan apat, sý tasqyny, búgin ǵana oryn alyp otyrǵan jaǵdai emes. Ókinishke qarai mundai jaǵdai jyl saiyn oryn alýda. Bul máseleniń sheshimi baiaǵyda tabylar edi, sebebi órkenietti elderde de tabiǵat apaty oryn alyp jatady, biraq ol jaqta birden sheshimin tabýǵa tyrysady. 21 ǵasyrda ómir súrip jatyrmyz, tehnologiianyń zamanynda bul máselelerdi sheshe almaý - basqarý organdarynyń qaýarsyzdyǵyn kórsetip otyr»,- deidi Qairat Dáýitqulov.
Basqarý organdarynyń áreketin memleket prezidenti Qasym-Jomart Toqaev shuǵyl keńes barysynda syńǵa aldy. Prezidenttiń aitýynsha, Úkimet pen jergilikti atqarýshy organdardyń arasynda júieli bailanys bolmaǵan.
Jiyn barysynda prezident sý tasqynyna qarsy ýaqytyly shara qabyldamaǵany úshin premer-ministrdiń birinshi orynbasary Roman Skliarǵa, Sý resýrstary jáne irrigatsiia ministri Nurjan Nurjigitovke qatań sógis, Aqtóbe, Qostanai, Batys Qazaqstan oblystarynyń ákimderine qyzmettik mindetterine tolyq sai kelmeýine bailanysty eskertý berdi. Al Atyraý, Aqmola, Almaty, Pavlodar jáne Abai oblystarynyń ákimderine qatań sógis jariialandy. Qairat Dáýitqulovtyń pikirinshe, prezident bul máseleni jeke baqylaýyna alýy kerek.
«Árine, qoldaimyz, eger shyn máninde bizdiń prezidentimiz durys ózgeristerdi jasaimyn, iske asyramyn dese,árine, qoldaimyz. Birinshi ret Qazaqstan tarihynda prezidenttiń keshirim suraýy úlken kórinis»,- deidi qoǵam belsendisi.
Oryn alǵan jaǵdaiǵa bailanysty premer-ministrdiń tóraǵalyǵymen Respýblikalyq shtab qurý, sondai-aq barlyq óńirde sý tasqynyna qarsy jumystardy kúsheitý, eń bastysy, azamattardyń qaýipsizdigin qamtamasyz etý jóninde tapsyrma berildi.
Shuǵyl túrde ótken keńesten keiin premer-ministr barlyq másele baqylaýǵa alynatynyn habarlady.
«Barlyq suraqtar táýlik boiy baqylaýda bolady. Kináli laýazymdy tulǵalar tártiptik jaýapkershilikke tartylady. Sý tasqynynan zardap shekken azamattar qaraýsyz qalmaidy. Barlyq shyǵyn óteledi», — dedi Oljas Bektenov.
Sonymen qatar shuǵyl túrde ótken keńes barysynda prezident Qasym-Jomart Toqaev jaǵdaidy qalypqa keltirý úshin shuǵyl sharalar qabyldaýmen qatar, júieli jumys qajet ekenin atap ótti.
Esterińizge sala ketsek, kún jylysymen Qazaqstannyń birneshe aimaqtaryn sý basyp, halyq qaýipsiz jerlerge kóshirilip jatyr.
