Memleket basshysy saýda jáne integratsiia ministri Arman Shaqqalievti qabyldady, dep habarlaidy Dalanews.kz.
Prezident saýda salasynyń qazirgi jai-kúii men aldaǵy damý baǵyttary týraly esepti tyńdady.
Memleket basshysyna 2025 jyldyń qorytyndysy boiynsha ishki jalpy ónimniń 19 paiyzǵa jýyǵy saýda-sattyqqa tiesili ekeni baiandaldy. Qazaqstan ekonomikasynyń mańyzdy sektorlarynyń biri sanalatyn salaǵa 1,2 trillion teńge investitsiia quiylǵan. Al taýar ainalymy 8,9 paiyzǵa ulǵaiyp, 80,3 trillion teńgege jetken.
Qasym-Jomart Toqaevqa elektrondy saýdanyń damýy jóninde málimet berildi. Byltyr onyń kólemi 3,9 trillion teńgeni quraǵan. Bul – bólshek saýdanyń 15 paiyzyna teń. Elimizde 10 logistika ortalyǵynan turatyn jeli qalyptasty. Astana men Almaty qalalarynda eki iri fýlfilment-ortalyq salynyp jatyr.
Saýda jáne integratsiia ministrligi elimizdiń eksporttyq áleýetin nyǵaitýǵa airyqsha mán berýde. Jahandaǵy ekonomikalyq syn-qaterlerge qaramastan, syrtqy naryqqa shyǵarylatyn shikizattyq emes taýar túrleri men qyzmetter kólemi 41 milliard dollarǵa jetti. Eksporttaýshylardy qarjylai qoldaý tetikteri aitarlyqtai keńeidi. Atap aitqanda, saqtandyrý somasynyń maksimaldy mólsheri 1,2 trillion teńgege deiin kóbeiip, qoldaý sharalary eki ese artty.
Memleket basshysyna Eýraziialyq ekonomikalyq odaq aiasynda atqarylyp jatqan jumystar jóninde aityldy. EAEO qurylǵannan beri 70 saýda kedergisiniń 69-y joiyldy. Kelissózder nátijesinde elimizdiń birqatar máselege qatysty ustanymy eskerildi. Onyń qatarynda Qazaqstan kásiporyndaryna dempingke qarsy baj salyǵyn tólemei, keibir taýar túrlerin kirgizýge kvota berý sekildi mańyzdy mámileler bar.
Prezident vedomstvoǵa zamanaýi saýda ekojúiesin qalyptastyrý, otandyq óndiristiń ósýine qolaily jaǵdai jasaý, tutynýshylardyń quqyqtaryn jan-jaqty qorǵaý, eksporttyq áleýetti nyǵaitý, sondai-aq, eldiń ekonomikalyq múddelerin ilgeriletý jóninde birqatar mindet júktedi.
