Óz kezeginde, Parlament Májilisindegi «AMANAT» partıasynyń depýtaty Elnur Beısenbaev prezıdenttik mandatty uzaqtyǵy 7 jyl bir merzimge shekteý jónindegi reformanyń mańyzdylyǵyn atap ótti.
– Budan bylaı Memleket basshysy tek bir ret qana prezıdent bolý múmkindigine ıe bolady. Ol qaıta saılana almaıdy. Prezıdent bir merzimge, bir-aq ret 7 jylǵa saılanatyn bolady. Zańnamadaǵy quqyqtyq kollızıany joıý úshin, bul ózgeristi, jańashyl saıası reformany bıyldan bastaýmyz qajet. Iaǵnı, aldaǵy 20 jyldyqta siz ben biz, jańadan saılanǵan eń kemi 3 prezıdentti kóretin bolamyz, – dedi halyq qalaýlysy.
Parlament Májilisindegi «AMANAT» partıasynyń taǵy bir depýtaty Gennadıı Shıpovskıh Memleket basshysynyń Ulttyq qordyń ınvestısıalyq tabysynyń 50%-yn 18 jasqa tolǵanǵa deıin balalardyń shotyna aýdarý bastamasyna basa nazar aýdardy.
– Esterińizde bolsa, biz baıaǵydan armandap kelgen dúnıemiz iske asty. Bul Arab elderindegideı ár bala ómirge kelgen kezde, arnaıy shot ashylyp, kámelet jasqa tolǵansha aqsha aýdarylady. Bolashaqta ony árbir jas baspanaly bolýy men bilim alýyna qoldana alady. Bul úshin Ulttyq qordyń ınvestısıalyq tabysynyń teń jartysy jumsalady. Memleket basshysynyń bul bastamasy árbir otbasyǵa jasalǵan tikeleı qamqorlyq, – dep atap ótti Gennadıı Shıpovskıh
«AMANAT» partıasynyń «Jastar Rýhy» jastar qanatynyń tóraǵasy Nurjan Jetpisbaevtyń aıtýynsha, elimizde bolyp jatqan oqıǵalarǵa beı-jaı qaramaıtyn belsendi jastar jetip artylady.
– Elimizde otanshyl ári belsendi, myqty jastarymyz jeterlik. Sońǵy 3 jylda bolǵan Arys, Maqtaral oqıǵasy jáne pandemıa kezinde elimiz boıynsha «Jastar Rýhy» uıymy 10 myńnan astam volonterdi toptastyrdy. Qostanaı óńirindegi órt kezinde de bizdiń jastarymyz birige bildi. «AMANAT» partıasy barlyq óńirde gýmanıtarlyq kómek qabyldaý pýnktterine 1 200 tonnadan astam turmystyq jáne qurylys zattaryn jınady. Bul iske árbir aımaqtyń janashyr turǵyny óz úlesin qosty. Eldiń tapsyrǵan amanatyn, meniń jas rýhtastarym Tobyl-Torǵaı jurtyna ýaqytyly tabystady. Memleket basshysy volonterlerimizdiń atqarǵan eńbegin joǵary baǵalap, alǵys aıtty, – dedi Nurjan Jetpisbaev.
Sóıtip, qala turǵyndary men qonaqtarynyń aldynda qazaqstandyq estrada juldyzdary óner kórsetti. Olardyń arasynda Mıras Júginisov, Nazıma, Ninety One, Aıqyn Tólepbergen, Ernar Aıdar, Dılnaz Ahmadıeva, Yenlik, 2 RAR, De Lacure, Ulyqpan Joldasov, Altynaı Jorabaeva, Beıbit Qorǵan, Qanat jáne Svetlana Aıtbaevtar, Aıdyn Jumabaev, Zarına Omarova, Estaı Muqashev, Maıra İlıasova, Haırolda Muratbek, Araılym Rahym, sondaı-aq memlekettik akademıalyq fılarmonıanyń ártisteri án shyrqady.
