Memleket basshysy Qasym-Jomart Toqaev Qostanaı oblysyndaǵy KIA avtomobılderin shyǵaratyn zaýyttyń qurylys alańyna bardy, dep habarlaıdy Dalanews.kz.
Prezıdentke qurylys jumystary byltyr qazan aıynda bastalǵany týraly baıandaldy. Josparǵa sáıkes, konveıerden alǵashqy kólik synaq rejıminde kelesi jyldyń shilde aıynda shyǵarylady.
KIA Qazaqstan bas dırektory Kım De Kı zaýyt 2025 jyldyń qazan aıynda iske qosylatynyn jetkizdi. Avtokásiporyn bastapqy kezeńde Sorento modelin shyǵarýdy josparlap otyr. 2026 jyldyń qańtar aıynan bastap jańartylǵan Sportage modeli qurastyrylady.
Kásiporynda jańadan 1500 turaqty jumys orny ashylady. Munda óndiristiń tıimdiligin arttyrýǵa ári ekologıalyq turǵydan zıansyz etýge baǵyttalǵan tehnologıalyq sheshimder qoldanylady. Avtomattandyrylǵan zamanaýı kásiporynnyń dánekerleý jelisinde, avtokólikti boıaý jáne qurastyrý jumystaryna 70 robot paıdalanylady. Jobanyń quny 200 mıllıon dollardy quraıdy, onyń 80 paıyzǵa jýyǵy tikeleı sheteldik ınvestısıanyń úlesinde.
Sonymen qatar Qasym-Jomart Toqaevqa jańa zaýyttyń janynan qosalqy bólshekter óndirisiniń klasterin qurý jobasy tanystyryldy. Búginde Lokalızasıa ortalyǵynyń qurylysy bastalǵan. KIA kompanıasy avtokólik komponentteri men qosalqy bólshekterin óndirýshi jahandyq kompanıalardy tartý boıynsha jumys júrgizip jatyr.
KSS Corporation kompanıasy avtokólik komponentteri bóliminiń basqarýshysy Pak Seıon men Seoyon Ehwa Global kompanıasy jahandyq bıznesti basqarý tobynyń jetekshisi Chang Seokvon Ońtústik Koreıanyń óndirýshileri Qazaqstanda óz óndirisin ashýǵa ázir ekenin aıtty.
