2024 jylǵy qyrkúiekte Memleket basshysy Qasym-Jomart Toqaev "Ádiletti memleket. Birtutas ult. Berekeli qoǵam" atty Joldaýynda qoǵamda ádilettilikti ornatý men eldiń turaqty damýyn qamtamasyz etý basty basymdyqtardyń biri ekenin atap ótken bolatyn. Ásirese, zań ústemdigin qamtamasyz etý, qaitarylǵan aktivterdi halyq igiligine jaratý, bilim salasyn damytý jáne investitsiialyq tartymdylyqty arttyrý máseleleri erekshe aityldy,- dep habarlaidy Dalanews.kz
Filosofiia, saiasattaný jáne dintaný institýtynyń ǵylymi qyzmetkeri jáne saiasattanýshy Qýanysh Sailaýdyń pikirinshe, bul bastamalar «Ádiletti Qazaqstan» tujyrymdamasynyń naqty júzege asýyna jol ashýda.
«Ádiletti Qazaqstan» tujyrymdamasy turǵysynan qaraityn bolsaq – bul eń aldymen ádilettilikti qalpyna keltirý. Eń birinshi biz myna nársege nazar aýdarýymyz kerek: memleketimizdiń damýyna paidalanýǵa bolatyn belgili bir resýrstar elden shyǵarylǵan. Qazir sol resýrstardy qaitarý, qaita bólý jáne olardy durys maqsatta paidalaný boiynsha jumys júrgizilýde. Eń basty bastamalardyń biri – qaitarylǵan aktivterdiń mektepter salýǵa jumsalýy. Bul sheshim eń aldymen qoǵamymyzdyń áleýmettik damýyna baǵyttalǵanyn kóremiz», - deidi ol.
Qazaqstanda zańsyz iemdenilgen aktivterdi elge qaitarý jumystary qarqyndy júrip jatyr. Qarjy monitoringi agenttigi men Bas prokýratýrasynyń dereginshe, 2022 jyldan beri 1,5 trln teńgeden astam qarajat memleketke qaitarylǵan. Aktivter qatarynda aqsha qarajattary, jyljymaityn múlik, jer telimderi men biznes nysandary bar.
Qaitarylǵan qarjy Qarjy ministrligi janynan qurylǵan Arnaýly memlekettik qorǵa túsip, áleýmettik mańyzy bar jobalardy júzege asyrýǵa baǵyttalýda. Búginde quny 318 mlrd teńgege jýyq 406 joba maquldanyp, onyń ishinde bilim berý, densaýlyq saqtaý, sport jáne sýmen jabdyqtaý salalaryna basymdyq berilýde.
Óńirlerde de naqty nátijeler kórine bastady. Máselen, Aqtóbe oblysynda erekshe qajettilikteri bar balalarǵa arnalǵan balabaqsha salynyp jatyr. Abai oblysynda 24 nysannyń qurylysy qolǵa alynǵan. Túrkistan oblysynda 35 sýmen jabdyqtaý jobasy iske asyrylýda. Almaty oblysynda jańa sport kesheniniń qurylysy bastaldy. Jambyl, Batys Qazaqstan, Jetisý, Qostanai jáne basqa óńirlerde meditsinalyq mekemeler, bilim berý nysandary men infraqurylym jobalary júzege asýda.
Prezident Qasym-Jomart Toqaev bul qarajattyń áleýmettik qajettilikterge jumsalýy tiis ekenin birneshe ret atap ótken. Sarapshylardyń pikirinshe, qaitarylǵan aktivterdiń halyq igiligine baǵyttalýy – ádiletti Qazaqstan tujyrymdamasyn júzege asyrýdaǵy naqty qadam. Bul bastamalar el azamattarynyń ómir súrý sapasyn jaqsartyp, óńirlik damýǵa serpin bermek.
