2024 جىلعى قىركۇيەكتە مەملەكەت باسشىسى قاسىم-جومارت توقايەۆ "ادىلەتتى مەملەكەت. ءبىرتۇتاس ۇلت. بەرەكەلى قوعام" اتتى جولداۋىندا قوعامدا ادىلەتتىلىكتى ورناتۋ مەن ەلدىڭ تۇراقتى دامۋىن قامتاماسىز ەتۋ باستى باسىمدىقتاردىڭ ءبىرى ەكەنىن اتاپ وتكەن بولاتىن. اسىرەسە، زاڭ ۇستەمدىگىن قامتاماسىز ەتۋ، قايتارىلعان اكتيۆتەردى حالىق يگىلىگىنە جاراتۋ، ءبىلىم سالاسىن دامىتۋ جانە ينۆەستيسيالىق تارتىمدىلىقتى ارتتىرۋ ماسەلەلەرى ەرەكشە ايتىلدى،- دەپ حابارلايدى Dalanews.kz
فيلوسوفيا، ساياساتتانۋ جانە ءدىنتانۋ ينستيتۋتىنىڭ عىلىمي قىزمەتكەرى جانە ساياساتتانۋشى قۋانىش سايلاۋدىڭ پىكىرىنشە، بۇل باستامالار «ادىلەتتى قازاقستان» تۇجىرىمداماسىنىڭ ناقتى جۇزەگە اسۋىنا جول اشۋدا.
«ادىلەتتى قازاقستان» تۇجىرىمداماسى تۇرعىسىنان قارايتىن بولساق – بۇل ەڭ الدىمەن ادىلەتتىلىكتى قالپىنا كەلتىرۋ. ەڭ ءبىرىنشى ءبىز مىنا نارسەگە نازار اۋدارۋىمىز كەرەك: مەملەكەتىمىزدىڭ دامۋىنا پايدالانۋعا بولاتىن بەلگىلى ءبىر رەسۋرستار ەلدەن شىعارىلعان. ءقازىر سول رەسۋرستاردى قايتارۋ، قايتا ءبولۋ جانە ولاردى دۇرىس ماقساتتا پايدالانۋ بويىنشا جۇمىس جۇرگىزىلۋدە. ەڭ باستى باستامالاردىڭ ءبىرى – قايتارىلعان اكتيۆتەردىڭ مەكتەپتەر سالۋعا جۇمسالۋى. بۇل شەشىم ەڭ الدىمەن قوعامىمىزدىڭ الەۋمەتتىك دامۋىنا باعىتتالعانىن كورەمىز»، - دەيدى ول.
قازاقستاندا زاڭسىز يەمدەنىلگەن اكتيۆتەردى ەلگە قايتارۋ جۇمىستارى قارقىندى ءجۇرىپ جاتىر. قارجى مونيتورينگى اگەنتتىگى مەن باس پروكۋراتۋراسىنىڭ دەرەگىنشە، 2022 جىلدان بەرى 1،5 ترلن تەڭگەدەن استام قاراجات مەملەكەتكە قايتارىلعان. اكتيۆتەر قاتارىندا اقشا قاراجاتتارى، جىلجىمايتىن مۇلىك، جەر تەلىمدەرى مەن بيزنەس نىساندارى بار.
قايتارىلعان قارجى قارجى مينيسترلىگى جانىنان قۇرىلعان ارناۋلى مەملەكەتتىك قورعا ءتۇسىپ، الەۋمەتتىك ماڭىزى بار جوبالاردى جۇزەگە اسىرۋعا باعىتتالۋدا. بۇگىندە قۇنى 318 ملرد تەڭگەگە جۋىق 406 جوبا ماقۇلدانىپ، ونىڭ ىشىندە ءبىلىم بەرۋ، دەنساۋلىق ساقتاۋ، سپورت جانە سۋمەن جابدىقتاۋ سالالارىنا باسىمدىق بەرىلۋدە.
وڭىرلەردە دە ناقتى ناتيجەلەر كورىنە باستادى. ماسەلەن، اقتوبە وبلىسىندا ەرەكشە قاجەتتىلىكتەرى بار بالالارعا ارنالعان بالاباقشا سالىنىپ جاتىر. اباي وبلىسىندا 24 نىساننىڭ قۇرىلىسى قولعا الىنعان. تۇركىستان وبلىسىندا 35 سۋمەن جابدىقتاۋ جوباسى ىسكە اسىرىلۋدا. الماتى وبلىسىندا جاڭا سپورت كەشەنىنىڭ قۇرىلىسى باستالدى. جامبىل، باتىس قازاقستان، جەتىسۋ، قوستاناي جانە باسقا وڭىرلەردە مەديسينالىق مەكەمەلەر، ءبىلىم بەرۋ نىساندارى مەن ينفراقۇرىلىم جوبالارى جۇزەگە اسۋدا.
پرەزيدەنت قاسىم-جومارت توقايەۆ بۇل قاراجاتتىڭ الەۋمەتتىك قاجەتتىلىكتەرگە جۇمسالۋى ءتيىس ەكەنىن بىرنەشە رەت اتاپ وتكەن. ساراپشىلاردىڭ پىكىرىنشە، قايتارىلعان اكتيۆتەردىڭ حالىق يگىلىگىنە باعىتتالۋى – ادىلەتتى قازاقستان تۇجىرىمداماسىن جۇزەگە اسىرۋداعى ناقتى قادام. بۇل باستامالار ەل ازاماتتارىنىڭ ءومىر ءسۇرۋ ساپاسىن جاقسارتىپ، وڭىرلىك دامۋعا سەرپىن بەرمەك.
