Prezident Joǵarǵy sot tóraǵasy Aslambek Merǵalievti qabyldady, dep habarlaidy Dalanews.kz.
Memleket basshysyna biylǵy jeti aidaǵy sot júiesi qyzmetiniń qorytyndylary jóninde baiandaldy.
Qasym-Jomart Toqaevqa azamattyq ister boiynsha daýlardy sheshýdiń balamaly ádisterin qoldaný 24 paiyzǵa, iaǵni, 61 myńnan 76 myńǵa deiin óskeni aityldy. Olardyń qatarynda mediatsiia, bitimge kelý men tatýlastyrý rásimderi bar.
Aslambek Merǵalievtiń aitýynsha, azamattardyń memlekettik organdarmen aradaǵy daýlar boiynsha quqyǵyn qorǵaý sheńberinde ákimshilik organdar men laýazymdy tulǵalardyń 2,6 myń aktisi (57 paiyz) zańsyz dep tanyldy.
Sondai-aq Prezidentke qylmystyq is júrgizýde konstitýtsiialyq quqyqtar men bostandyqtardy qamtamasyz etý sharalary týraly málimet berildi. Atap aitqanda, tergeý sottarynyń qamaýǵa alýdy sanktsiialaýdan bas tartý úlesi 23 paiyzdan 37 paiyzǵa ósti. Aqtalǵan azamattardyń sany (jeke aiyptaý isterin qospaǵanda) 59-dan 88-ge jetti.
Memleket basshysynyń tapsyrmasyna sáikes, biylǵy 1 shildeden bastap derbes kassatsiialyq sot jumys istei bastady. Alǵashqy aidyń ózinde atalǵan mekemege 5 myńǵa jýyq aryz-shaǵym túsken.
Kezdesý sońynda Qasym-Jomart Toqaev halyqtyń sot júiesine senimin nyǵaitý jáne sot tóreliginiń sapasyn arttyrý jumystaryn jalǵastyrýdyń mańyzdy ekenin atap ótti.
