Memleket basshysy Ishki ister ministri Erjan Sádenovti qabyldady, dep habarlaidy Dalanews.kz.
Qasym-Jomart Toqaevqa eldegi kriminogendik ahýal, ishki ister organdaryna júktelgen mindetterdiń oryndalýy, sonyń ishinde «Zań jáne tártip» qaǵidatyn ornyqtyrý jumystary jóninde baiandaldy.
Erjan Sádenov 10 aida eldegi qylmys sany 5,3 myńǵa azaiǵanyn jáne qylmystyń izin sýytpai ashý deńgeii jaqsarǵanyn jetkizdi.
Otbasylyq-turmystyq deńgeidegi quqyqbuzýshylyqtarmen kúres belsendi túrde júrgizilip jatyr. Aldyn alý jumystarynyń nátijesinde turmystyq sipattaǵy qylmys sany – 8 paiyz, onyń ishinde kisi ólimine ákelip soǵatyn jaǵdailar 26 paiyz azaidy.
Prezidentke berilgen málimetke sáikes, izdeýde júrgen 1 391 adam ustalǵan. Olardyń 138-i shetelde qolǵa tústi. Jedel is-sharalar barysynda 30 tonnadan astam esirtkiniń, sonyń ishinde bir tonnadan astam sintetikalyq zattardyń ainalymǵa túsýine jol berilmedi.
Uiymdasqan qylmysqa qarsy is-qimyl aiasynda aýyr jáne asa aýyr qylmysqa qatysy bar 185 qylmystyq top ustaldy. Internet-alaiaqtyqpen kúres baǵytynda 12 koll-ortalyq joiyldy. Onyń jeteýi shetelde ornalasqan. Shamamen 83 million frod-qońyraý jáne 4 myń alaiaqtyqpen ainalysqan sait buǵattaldy. Sondai-aq alaiaqtardyń 2,3 milliard teńge qarajatty elden shyǵarýyna tosqaýyl qoiyldy.
Memleket basshysyna jol qaýipsizdigi men quqyqtyq tártipti qamtamasyz etý maqsatynda engizilip jatqan tsifrlyq sheshimder tanystyryldy. Máselen, drondar kómegimen 6 myńnan astam, ortasha jyldamdyqty ólsheý júieleri arqyly 190 myńnan astam jol júrý erejesin buzý deregi anyqtaldy. Qabyldanǵan sharalar nátijesinde jol-kólik oqiǵasy kezindegi ólim-jitim sany 9,4 paiyz, sonyń ishinde mas kúiinde kólik júrgizýshiler kinásinen bolatyn qaiǵyly jaǵdailar 24 paiyz azaidy.
Egov mobile jáne jetekshi bankter qosymshalaryna integratsiialanǵan «Zań jáne tártip» mobildi servisi iske qosylǵannan beri azamattardan 32 myńnan astam ótinish túsken.
Sonymen qatar Memleket basshysyna ekstremizmge qarsy kúres pen kóshi-qondy baqylaý sharalary jóninde baiandaldy.
Kezdesý sońynda Qasym-Jomart Toqaev eldegi quqyqtyq tártip pen qoǵamdyq qaýipsizdik deńgeiin odan ári arttyrý boiynsha birqatar naqty tapsyrma berdi.
