Qasym-Jomart Toqaev Ulttyq quryltaida Joshy ulysynyń, Altyn ordanyń tarihi mán-mańyzyn túsindirdi, - dep habarlaidy Dalanews.kz.
"Biyl Joshy ulysynyń negizi qalanǵanyna 800 jyl toldy. Búgingi jiynymyz da osy mereili beleske tuspa-tus kelip otyr. Munyń zor simvoldyq máni bar. Biz asta-tók toi jasaýǵa emes, salmaqty zertteý júrgizýge basa mán berýimiz kerek. Joshy ulysy Qazaqstannyń memlekettilik dástúrinde airyqsha oryn alady. Elimizdiń ótkeni, búgini men bolashaǵy onyń tarihi murasymen tyǵyz astasyp jatyr. Endeshe, Altyn Orda týraly halyqaralyq arenadaǵy túsinik Qazaqstanmen tikelei bailanysty bolýy kerek.
Jaqynda Altyn Ordanyń tarihy jáne áigili tulǵalary týraly kóp seriialy derekti film túsirý úshin tiisti jumystar bastaldy. Oǵan sheteldiń tanymal mamandary tartylyp jatyr. Film belgili halyqaralyq platformalar arqyly kórsetilýi kerek. Jalpy elimizdi álemge tanytý úshin Altyn Orda brendin jan-jaqty jáne keńinen paidalaný qajet. Ony tolyq zertteý úshin tabandy jumys isteý kerek. Bul baǵytta biraz sharýa atqaryldy. Meniń bastamammen Joshy Ulysyn zertteitin ǵylymi institýt quryldy.
Qazir Qazaqstannyń jeti tomdyq jańa akademiialyq tarihyn jazý úshin naqty jumys jasalyp jatyr. Oǵan 250-den astam ǵalym, sonyń ishinde 60 sheteldik maman jumyldyryldy. Akademiialyq basylymnyń osyndai úlgisin ázirleý tájiribesinde alǵash ret Joshy ulysyna jeke tom arnalmaq. Ony daiyndaýǵa Reseidiń kórnekti tarihshysy Vadim Trepavlov ta atsalysty.
Ókinishke qarai, ol jaqynda ómirden ozdy. Biraq Vadim Trepavlov óte qundy zertteý materialdaryn ázirlep, ony kóptomdyqtyń redaktsiialyq alqasyna tabystap ketti. Bul – Qazaqstan men Reseidiń tarihi mektepteri arasyndaǵy tiimdi yqpaldastyqtyń jarqyn kórinisi", - dedi ol.
