Memleket basshysy Qasym-Jomart Toqaev Almaty áýejaiynyń jańa halyqaralyq terminalyna bardy, - dep habarlaidy Dalanews.kz.
Prezident Qasym-Jomart Toqaevtyń Almatyǵa jumys sapary qala áýejaiynyń jańa halyqaralyq terminalyn aralap kórýden bastaldy.
Memleket basshysyna terminaldyń ashylýy qarsańynda qurylystyń qalai júrgizilgeni jóninde baiandalyp, jolaýshylardy tirkeý, shekara jáne kedendik baqylaý aimaqtary, júk bólimi tanystyryldy.
«Almaty halyqaralyq áýejaiy» AQ prezidenti Alp Er Týnga Ersoi seismikalyq jáne órt qaýipsizdigi talaptaryn saqtai otyryp salynǵan terminal magnitýdasy 10 balǵa deiingi jer silkinisine tótep bere alatynyn aitty. Ǵimarattyń jalpy aýdany 53,5 myń sharshy metrdi quraidy, jylyna 14 million jolaýshyǵa qyzmet kórsete alady.
Jańa terminal Ortalyq Aziiada birinshi bolyp Excellence in Design for Greater Efficiencies (EDGE) baǵdarlamasy boiynsha sertifikat alady.
Jolaýshylar men aviakompaniialar sanynyń ósýin eskere otyryp, 50 tirkeý baǵany jumys isteitin bolady. Ol úshin jańa jabdyqtar satyp alynǵan. Terminalda múmkindigi shekteýli adamdar úshin tolyqtai jaǵdai jasalǵan.
Budan keiin Prezident áýejaidyń jańa VIP-terminalyn aralap kórdi.
Memleket basshysy qala jáne el týraly alǵashqy áser áýejaidan qalyptasatynyn atap ótti.
– Almaty halyqaralyq áýejaiy – elimizdegi eń iri áýe ailaǵy. Ońtústik astanamyzdy tamashalaityn týrister sany jyl saiyn artyp keledi. Byltyr qalaǵa 2 millionnan astam týrist kelip-ketken. Osydan eki jyl buryn qurylys ornyna kapsýla salý rásimine qatysyp edim. Al erteń, mine, Almaty halyqaralyq áýejaiynyń jańa terminaly alǵashqy reisterge qyzmet kórsetpek, – dedi Qasym-Jomart Toqaev.
Prezident terminal qurylysyn halyqaralyq standarttarǵa sai júrgizgeni úshin TAV GROUP kompaniiasyna, sondai-aq Almaty úshin osyndai mańyzdy jobaǵa atsalysqan kreditorlar kontsortsiýmy – Eýropalyq qaita qurý jáne damý bankine, Halyqaralyq qarjy korporatsiiasyna jáne Eýraziialyq damý bankine alǵys aitty.
