Prezident Qasym-Jomart Toqaev Aqordada halyqaralyq pán olimpiadalary jeńimpazdarymen jáne júldegerlerimen kezdesti. Is-sharaǵa 24 laýreat, sonyń ishinde 4 altyn, 11 kúmis jáne 9 qola medal iegeri shaqyryldy,- dep habarlaidy Dalanews.kz.
Qasym-Jomart Toqaev jastarǵa barynsha jaǵdai jasaý memlekettiń basty mindetiniń biri ekenine toqtaldy.
"Qazir elimizdiń ár aimaǵynda zamanaýi úlgidegi "Keleshek mektepteri" ashylyp, muǵalim mártebesin kóterýge basa mán berilip jatyr. Ǵylym jolyna túsken jastarǵa jan-jaqty qoldaý kórsetilip keledi.
Bul rette "Bolashaq" halyqaralyq stipendiiasy tiimdi ról atqaryp otyr. Joba aiasynda myńdaǵan jas azamat álemniń ozyq ýniversitetteri men zertteý ortalyqtarynda bilim aldy. Búginde olardyń kóbi elimizdi órkendetýge mol úles qosyp jatyr. Aldymyzda turǵan mindet – osy stipendiiaǵa naǵyz qabiletti, daryndy balalardy irikteý. Kezdeisoq adamdardy qosýǵa bolmaidy.
Sondyqtan kelesi jyldan bastap halyqaralyq olimpiada jeńimpazdaryn "Bolashaq" baǵdarlamasy boiynsha oqýǵa jiberý týraly sheshim qabyldandy. Osylaisha biz daryndy ári talapty jastarǵa jan-jaqty qoldaý kórsete beremiz", – dedi Memleket basshysy.
Prezidenttiń pikirinshe, halyqaralyq bedeldi olimpiadalardaǵy jastardyń jetistikteri ultymyzdyń ziiatkerlik qýaty men óskeleń urpaqtyń zor áleýetin tanytady.
"Elimizge ǵalymdar, injenerler, pedagogtar, dárigerler men basqa da joǵary bilikti mamandar qajet. Ásirese, jasandy intellekt salasyndaǵy mamandar airyqsha suranysqa ie bolady. Innovatsiia men joǵary tehnologiialar negizinde elimizdiń aldaǵy damý kezeńderiniń berik irgetasyn qalap jatyrmyz. "Rosatom" kompaniiasymen birge salynatyn alǵashqy atom elektr stansasy strategiialyq mańyzǵa ie. Birer kún buryn onyń qurylysy resmi túrde bastaldy. AES energetika nysany ǵana emes, ǵylymi-tehnikalyq progrestiń jarqyn simvoly bolýǵa tiis. Ázirge onyń ataýy joq.
Bul elimizdegi tuńǵysh stansa bolǵandyqtan, halyq arasynda úzdik ataý jóninde baiqaý jariialaýǵa bolady dep sanaimyn. Osy saiysqa qatysyp, shyǵarmashylyq qarymdaryńyzdy kórsetýge shaqyramyn. Bálkim, sheshim qabyldaǵan kezde sizderdiń de usynystaryńyzǵa súienermiz", – dedi Prezident.
Memleket basshysy jastarǵa ǵibratty sózin arnady.
"Biz qazir bárimiz bir el bolyp Ádiletti, Taza ári Qaýipsiz Qazaqstandy quryp jatyrmyz. Bul jai saiasi naýqan emes. Bul – memlekettiligimizdi nyǵaitý degen sóz. Osy aýqymdy jumysty jastarymyz úshin bastadyq. Endi ony mindetti túrde oryndaýymyz qajet. Onyń bar igiligin eń aldymen óskeleń urpaq, iaǵni sizder kóresizder! Men elimizdiń jastaryna zor senim artamyn. Qazaqstan jastary kózi ashyq, kókiregi oiaý, oiy ushqyr, daryndy, eńbekqor azamattar dep únemi aityp júremin. Ul-qyzdarymyz árqashan adal azamat degen atqa sai bolsyn dep tileimin. Eń aldymen Otanǵa, elimizge adal bolyńyzdar. Sizder halqymyzdy jer júzine ziiatker ult retinde tanytyp júrsizder. Árdaiym izdenis pen eńbek jolynda bolyńyzdar. Óskeleń urpaq sizderge – talantty jastarǵa qarap boi túzeidi", – dedi Qasym-Jomart Toqaev.
