Úkimet basshysy Oljas Bektenov ata-analarǵa úndeý jasady, – dep habarlaidy Dalanews.kz.
Premer-ministr Oljas Bektenovtiń tóraǵalyǵymen ótken Úkimet otyrysynda oqý jylynyń aiaqtalýy jáne balalardyń jazǵy demalysyn uiymdastyrý máseleleri qaraldy. Elimizde biylǵy oqý jylyn 3,9 mln oqýshy aiaqtaǵaly otyr, onyń 200 myńnan astamy - on birinshi synyp oqýshysy.
"Biyl eki júz myńnan asa bala mektep bitiredi. Mindet aiqyn. Barlyq emtihandy, ulttyq biryńǵai testileýdi, balalardyń jazǵy demalysy men saýyqtyrý sharalaryn joǵary deńgeide uiymdastyrý qajet. Testileý men emtihan kezinde, sońǵy qońyraý jáne mektep bitirý keshterinde balalardyń qaýipsizdigin qamtamasyz etýge erekshe nazar aýdarý qajet. Óitkeni dál osy kezeńde túrli keleńsiz jaǵdailardyń qaýpi arta túsedi", - dedi Oljas Bektenov.
Oljas Bektenov tiisti organdarǵa balalardyń qaýipsizdigin qamtamasyz etýge erekshe nazar aýdarýdy tapsyrdy.
"Ata-analarǵa aitarym, mektep bitirý keshterinde, eń bastysy jazǵy demalys kezinde balalardy qaraýsyz qaldyrmaǵan jón. Osyǵan basa kóńil bólýdi suraimyn. Ata-ananyń aialy alaqany men meiirimi balanyń janyn jaqsylyqqa bóleidi. Olardyń boiyndaǵy adamgershilik negizderi, qoǵamdyq ortadaǵy is-áreketi men otanshyldyq qasietteriniń barlyǵy birinshi kezekte otbasynda qalyptasady. Eshqandai ministrlik ata-ana qamqorlyǵy men tárbiesin almastyra almaidy. Elimizdiń laiyqty azamattaryn tárbieleý – memleket pen qoǵamnyń birlesken úlken eńbeginiń jemisi. Sondyqtan sanaly, bilimdi jáne naǵyz otanshyl azamattardy qalyptastyrýda kúsh-jigerimizdi nyǵaita túseiik degim keledi", - dedi Oljas Bektenov.
